Door di biaha na paisnan cu riesgo:
ORANJESTAD (AAN) – Vacacion grandi a cuminza, y for di e siman aki hopi hende local lo ta biahando pa exterior y tambe residentenan, por ehemplo di Colombia, ta cla pa biaha pa nan pais pa topa cu nan famia y amistadnan ayanan.
Esaki ta sosode tur aña unda famianan ta probecha pa cambia di ambiente un tiki, vooral si nan tin familiarnan pa bishita, of a spaar suficiente pa por disfruta di un bon ambiente den naturaleza, cu un clima mas fresco y actividadnan diferente, pa nan recarga di energia y baha stress den un ambiente relaha, y tin paisnan cu hotelnan cu ta ofrece paketenan bon atractivo pa e temporada aki.
DIARIO a scucha di fuente bon informa, di salud publico, cu e ultimo dos simannan e departamento di malesanan contagioso tabata hopi druk, cu vacunacion contra keintura gel, ya cu basta hende ta biahando na paisnan cu tin brote, unda nan mes ta exigi pa pasaheronan di otro paisnan bin vacuna y presenta nan carnet cu ta mustra esaki.
Esaki ta un vacuna cu tin vigencia durante diez aña, locual ta un ventaha pa esnan cu na 2015 a tum’e, pero pa biaha e aña aki na e lugarnan cu por tin riesgo, nan mester a bolbe hay’e, y esey a yuda haci cu e departamento a bira hopi druk.
Ta di spera cu ningun hende lo a keda sin cumpli cu e rekisito aki, y tambe cu lo no a keda sin busca un seguro di malesa. Esaki, DIARIO por a compronde s aumenta di prijs “un tiki pica”. No obstante, tin hende cu ta cumpra e seguro aki como un obligacion, pasobra tin paisnan unda esaki ta un exigencia total. Sinembargo, no tur ta biaha cu suficiente placa pa preveni, si por confronta cu gastonan di malesa si algo pasa, pasobra e seguro riba su mes no ta cubri nada den exterior, sino cu e pasahero tin cu paga cash y bin Aruba cu e comprobante di pago, pa akinan e compania dun e bek un porcentahe di e gasto. Sinembargo, ta miho pa for di momento di planea un biahe, cuminza reserva un suma cu por yuda subsana, aunke sea un parti importante, di un tratamento medico cu por bira necesario pa e pasahero, sea e mes of un yiu, por ehemplo.
En todo caso, deseonan di feliz biahe, sin ningun contratempo y cu e proteccion di Dios, na tur e viaheronan cu a sali caba y ta sigui sali di Aruba pa un par di siman, pa disfruta cu nan yiunan, of di forma individual, e vacacion grandi aki.
