Reunion pa delibera posicion di hende muhe pa wordo trata den SIDS Conference

Prome Ministro a topa cu CEDEHM

ORANJESTAD (AAN): Recientemente Prome Minister Evelyn Wever-Croes a reuni cu CEDEHM (Centro di Desaroyo di Hende Muher) riba diferente tema. CEDEHM a haci un estudio cu a trece informacion dilanti di e perfil di e hende muhe na Aruba na aña 2024.

   Estudio perfil hende muhe na Aruba: E resultado di e estudio hopi interesante y profundo aki a mustra riba cua terenonan e hende muhe na Aruba ta mas activo. Algun area a refleha cifranan cu ta basta bon, mirando cu mas di 40% di managernan di companianan na Aruba ta hende muhe pero un otro dato menos positivo ta cu segun e registro di Camara di Comercio, solamente 15% di directornan di companianan registra ta femenino. A base di e datonan aki por wak cu na Aruba ainda tin hopi trabao pa haci pa mehora esaki.

   Small Island Developing States (SIDS) Conference: Otro tema di importancia cu tambe a toca durante e reunion cu CEDEHM ta e conferencia di SIDS cu lo tuma luga fin di luna di Mei 2024 na Antigua and Barbuda. E asina yama Small Island Developing States Conference ta worde organiza pa Nacionnan Uni y ta tuma luga un biaha cada 10 aña. E conferencia aki ta solamente pa paisnan chikito pa asina duna e atencion debido na e paisnan aki, ya cu den otro conferencianan grandi unda tur pais ta participa, e chens pa paisnan chikito haya e atencion ta menos grandi.

   Aruba ta bay tin un rol hopi importante pa desplega. Un di nan ta hunto cu UN Women, cu ta e agencia di Nacionnan Uni cu ta atende cu e derechonan di hende muhe y lo tin un conferencia di dos dia riba e tema di e posicion di hende muhe. Aruba, bou representacion di Prome Minister Evelyn Wever-Croes a worde invita pa duna e discurso di apertura durante e conferencia aki. Pa e motibo aki e mandatario hunto cu Centro di Desaroyo di Hende Muher (CEDEHM) ta trahando riba e puntonan cu mas lo mester bay enfoca riba dje pa cu esaki.

   “CEDEHM a worde encarga tambe door di mi persona pa ta na cabes di un comision pa traha pa stop e abuso di hende muhe cu ta un tema tambe hopi importante y e trabaonan ta bayendo den bon direccion. Claro e ta un problematica hopi amplio pero ya caba tin recomendacionnan cu nos tin cu traha riba nan”, Prome Minister a indica.