ORANJESTAD (AAN): Diasabra anochi na Cas di Cultura, durante un evento di e organisacion di Miss Youth Aruba pa lansa nan candidatanan nobo,
a tuma lugar un ceremonia cortico di coronacion tambe di un finalista di aña pasa.
Ta trata aki di Mary-Jane Kransen kende aña pasa na Augustus a keda eligi como 3rd Runnerup di Miss Youth Aruba 2023. El a representa distrito di Brazil.
El a wordo corona como “Miss Teen Mundial Aruba 2024” door di ganadora di aña pasa Amelia Elskamp, y e corona mes a wordo poni door di organisador Robin Croes-Ponson.
Di e forma aki, Mary-Jane Kransen lo bay representa na Aruba na luna di Juli venidero den e certamen di Miss Teen Mundial 2024 cual certamen lo ta na El Salvador. E lo ta viahando cu su preparador Gio Giel pa e pais na Centro America.
Maestronan di ceremonia e anochi a puntra Mary-Jane con ta bayendo cu e preparacionnan, y el a laga sa cu tur cos ta suave, y ta tumando extra curso pa por domina spaño mihor, ta ricibiendo extra informacion di historia di Aruba pa asina por relata esey ora di e certamen. Nan a ofrece par di palabra di conseho y esaki publico a admira basta hopi.
https://diario.aw/categories/noticia/general/mary-jane-kransen-corona-como-miss-teen-mundial-aruba-2024#sigProIdaf49491223
