Awor ta Pueblo di Francia ta protesta contra abuso di debe nacional
- Na 2030 interes ariba debe mundialmente por bira 100 porciento
- UNCTAD: Interes mundial ariba pago ta kita pan for di boca di hende
ORANJESTAD (AAN) E siman aki uno di e temanan importante na mundo ta rementa na Europa, caminda Francia ta prepara su mes pa accionnan di comunidad contra e peso cu Debe Nacional a bira pa e pais.
Segun e exigencianan di democracia, tur loke ta relaciona cu gobernacion, na un forma directo na prome lugar mester beneficio e hende cu ta forma parti di e pais democratico.
“Un mundo di debe” ta e relato di 2025 di UCTAD, e organo di comercio y desaroyo di Nacionnan Uni.
Kico e “mundo di debe” ta nifica pa e pagador di belasting ta bini dilanti den e rapport di 2025, cu ta splica con derecho basico di democracia, cu ta bienestar di hende, ta worde kibra cu creaccion di debe nacional, cu ta habri porta pa pago di interes, cu ta destrui directamente e derechonan di ciudadano pa worde beneficia cu produccion di nan pais.
Na un forma cu no ta laga lugar pa duda, ta worde splica cu Debe Nacional ta nifica cu ta crea un sistema cu ta ocasiona interes, cu e resultado cu placa di belasting cu mester worde uza pa bienestar di hende, ta bay na pago di interes di debe, cu politiconan ta crea.
Con serio esaki ta, ta bini dilanti tambe na Europa conoci cu uno un union di paisnan cu economianan grandi pero tambe cu reglamento di e haltura di debe nacional.
Ayera tabata turno di Francia pa drenta noticia mundial na momento cu a worde anuncia cu awe lo tin protestanan publico na Francia contra debe nacional cu e Gobierno Frances a crea y a bira peso pa e Pueblo.
Esaki a bira porta pa mundo presta atencion na e abuso gubernamental cu un maneho cu ta basa of ta inclui aumento di debe, ta encera pa e Pueblo cu mester paga pa e debe.
E accionnan na Francia a sostene estudionan cu a worde haci na cantidad for di momento cu Covid-19 a exigi aumento di debe nacional y politiconan na nivel internacional a worde exigi pa percura pa bon maneho di placa di Pueblo.
Debe Nacional ta kita placa for di boca di Pueblo, cu no solamente ta paga belasting pero tambe ta perde derechonan pasobra placa mester bay pa paga debe y interes di debe.
Francia ta parti di e totalidad mundial cu ta confronta e resultadonan di creaccion y pago di debe, cu e organo di Nacionnan Uni, UNCTAD, ta describi den su rapport di 2024.
Den e rapport a bini dilanti, cu na 2024 un suma record di 102 Trillon (Biljoen na Hulandes) Dollar a bira e suma di debe na mundo.
Tristo ta cu ta paisnan den desaroyo a bira prome victima y awor mester paga 921 Biyon na interes ariba prestamonan cu ta exigi pa na 61 pais, Gobierno paga 10 porciento di su entrada na interes.
Segun e rapport di UNCTAD na 2030 debe nacional na nivel internacional por alcansa 100 porciento di tur loke un pais produci.
Covid-19 tabata tin impacto grandi ariba tur pais pero e paisnan cu mas a sufri tabata e paisnan mas vulnerabel pa motibo di mal maneho di placa na nan pais of e paisnan di mas pober na mundo.
3.4 Biyon di hende na mundo ta biba na paisnan cu ta paga mas interes ariba debenan cu nan ta paga pa asuntonan di salud of educacion.
E rapport ta papia di e impacto di Covid-19 cu, sinembargo, na varios pais a topa cu mal maneho gubernamental loke a exigi e sumanan enorme cu a worde presta.
No ta solamente Covid-19 tabata responsabel pa e caos humanitario cu mundo conoce actualmente ya cu debe nacional tabata presente na cantidad di pais, cu no a crea reserva pero debe manera e rapport ta encera.
Francia ta uno di e paisnan cu a cuminsa protesta con placa cu mester sirbi interes basico di Pueblo ta worde gasta na pago di debe door di Gobierno, loke Pueblo Frances ta rechaza.
Informantenan di DIARIO a trece dilanti, cu awor cu cifranan ta mira luz den e cuadro di salida di prijs di petroleo cu lo trece cambionan grandi, e debenan ya existente na paisnan, ta kibra bienestar di hende como prome exigencia di democracia.
Final di 2025 lo bira sumamente interesante segun expertonan, cu ta sostene informacionnan di DIARIO pa asina entrega Aruba tur informacion necesario cu organonan internacional ta presenta actualmente na mundo pa medio di prensa cu mester informa Pueblo den situacionnan serio cu ta presenta na mundo!
