Resultadonan prometedo logra a traves di Education Standards and Strategy Workshop

Dutch Caribbean Nature Alliance

ORANJESTAD (AAN): Informacion for di isla di Saba, ta indica cu recientemente Dutch Caribbean Nature Alliance (DCNA) a organiza Education Standards and Strategy Workshop, treciendo hunto autoridadnan respeta di parke y conservacion di e region di Caribe Hulandes.

   E tayer a enfoca riba desaroyo di normanan di educacion, elaboracion di strategia educativo eficaz pa e organizacionnan di parke, Fundacion di Parke Nacional Aruba, Saba Conservation Foundation, Nature Foundation St. Maarten y St. Eustatius National Parks Foundation. E evento a tuma luga di dia 4 pa dia 6 di juli y esaki a resulta den un exito rotundo, cu adkisicion di informacion valioso y logro di resultadonan uzabel.

   E tayer tabatin como meta establece un framework uniforme pa normanan educativo den e parkenan participante, pa garantisa experiencia educativo consistente y di calidad halto. Door di sincronisa nan esfuersonan educativo, e organizacionnan di parke lo fomenta un miho comprension y apreciacion di e biodiversidad natural unico cu tin na nan respectivo islanan.

   Durante e tayer e representantenan di e parkenan y conservacion a participa den discusionnan solido y sesionnan di intercambio di conocemento pa desaroya strategia cu lo mehora e iniciativanan educativo dentro di nan organizacionnan. E personanan cu a asisti a explora varios enfoke, sacando bentaha di nan experiencia colectivo pa crea programa educativo impactante cu ta inspira maneho ambiental, conservacion di biodiversidad y practica sostenibel.

Un di e resultadonan significativo di e tayer tabata identificacion y comprension di e gapnan cu ta existi den ofrecemento di enseñansa di e organizacionnan participante. Door di reconoce e gapnan aki, e organizacionnan por atende esaki den colaboracion cu otro y por sobrepasa esaki cu solucion directo, sigurando un plan di educacion di naturalesa mas comprensivo.

E tayer tambe a facilita un red fructifero y colaboracion entre e organizacionnan. Door di a comparti e miho practicanan y experiencianan, e personanan presente a descubri forma nobo di cooperacion, manera proyecto educativo hunto y intercambio di fuente. Fortalecimento di e relacionnan aki lo promove sinergia y lo permiti e organizacionnan traha colectivamente riba nan metanan comparti di conservacion y educacion ambiental.

DCNA, como organismo organizado, a expresa su satisfaccion cu e resultadonan di e Education Standards and Strategy Workshop. E aliansa ta reconoce e papel fundamental cu educacion tin den fomento di un conexion profundo entre hende y naturalesa, y ta sigui comprometi pa apoya y facilita un miho colaboracion entre e organizacionnan di e parkenan di Caribe Hulandes.

Nos lo kier extende nos mas sincero gradicimento na Oficina di Turismo di Saba pa e apoyo cu e Sala di Conferencia Glenn Holm y e generoso apoyo brinda pa nos patrocinado, WWF-NL, pa nan contribucion di hopi balor na e exito di Education Standards and Strategy Workshop. Nos ta aprecia masha nan asociacion, experiencia y apoyo continuo pa avansa den nos mision comparti di proteha naturalesa di Caribe Hulandes.