Director Ing. Marlon Croes:
ORANJESTAD (AAN): Den entrevista cu DIARIO, Director di DOW, Ing. Marlon Croes a comenta cu siman pasa el a reuni cu nan supervisornan y a pone como meta hopi estrecho, cu DOW kier haci mas control, pa nan tin mas data. Y nan kier cuminza, banda di esey, stuur e contratistanan. DOW su tarea primordial ta pa corta mata, pa e distancia di dos meter y mey of tres meter, y algun caminda cu ta cuater meter, mantene limpi y zorg pa tin bista pa trafico por core safe, por subi wak caya.
Banda di esey, desde 30 aña pasa, DOW ta piki tur e material di plastic, papel, etc., cu tin riba caya y nan ta haci e trabao aki di biaha. Pero e tarea aki no ta di DOW primordialmente, pero e ta bin di e filosofia desde e tempo aya, cu tabata tin diferente programa di limpieza di Aruba y DOW a duna su aporte na esaki, pa yuda tene Aruba limpi y e departamento a keda cune te dia di awe, Ing. Croes a remarca. “Nos lo sigui hacie, pero e ta rekeri tambe di e contribucion di otro departamentonan y di nos comunidad”, director di DOW enfatiza.
