ORANJESTAD (AAN): Durante e di prome trimester di 2021, consumidornan tabata menos pesimista mientras cu e confiansa di consumidor a subi te na 93,6, un aumento di 0,6 punto di indice (Grafiek 1).
Na final di e di prome trimester, e preocupacion mas grandi di consumidornan tabata nan oportunidad di empleo mirando cu 70 porciento di encuestadornan a raporta cu pa haña trabou a bira mas dificil compara cu 6 luna pasa.
Tambe, 65 porciento di nan ta haña cu e posicion financiero di gobierno a empeora y 64 porciento a indica cu nan ta preocupa ainda pa nan estado di salud. Por nota cu 72 porciento di encuestadornan a raporta cu nan lo tuma e vacuna den 2021. Un 56 porciento di nan ta sinti cu e condicionnan di negoshi y economico a deteriora, mientras cu 55 porciento a indica cu nan situacion financiero na cas a keda igual compara cu 6 luna pasa.
Den e di prome trimester di 2021, e indice di e situacion actual a subi cu 0,4 punto di indice te na 92,1, mientras cu e indice di expectativa a crece te na 96,0, for di 94,2 den e trimester anterior, reflehando sentimentonan menos pesimista di consumidornan pa cu nan futuro.
Mas cu mita (56 porciento) di e encuestadornan ta anticipa cu e periodo di e recuperacion economico di Aruba lo dura mas cu 2 aña pa recobra completamente di e crisis causa pa COVID-19. Den e di prome trimester di 2021, 72 porciento di encuestadornan a raporta cu compra di un auto no tabata apropia, 67 porciento a informa cu tuma un prestamo no tabata adecua, mientras cu casi 62 porciento a indica cu bai cu vakantie of tuma un hipoteca no tabata adecua.
Consecuentemente, e indice di habito di consumidor a subi te na 93,6 den e di prome trimester di 2021, for di 93,4 den e di ultimo trimester di 2020.
Wak Grafiek 1: Indice di Confiansa di Consumidor
Informacion adicional riba e encuesta di confiansa di consumidor ta disponibel riba website di CBA
