ORANJESTAD (AAN) — Si awe un cantidad di ciudadano di Aruba a wordo deteni y dos sospechoso ya a pasa pa e fase di 60 dia di detencion cu a bira awor “gevangenhouding”,
ta un indicacion cu pa ley metemento di politica den asunto di tereno ta condenabel.
Ley ta splica e forma cu mester atende cu tereno di Gobierno y con un ciudadano mester aplica pa e haya un tereno sin distincuin di persona y sin intervencion politico.
E leynan riba cual e areglonan aki ta basa hustamenta ta sirbi pa evita cu gruponan elitario cu tin contacto cu politiconn, haya algo cu otro miembro di comunidad no por ricibi.
Na Aruba tin cantidad grandi di ciudadano cu ta anhela pida tereno pa nan por construi nan cas.
Un problema cu no ta existi solamente na Aruba pero na tur pais democratico cu conoce e sistemanan cu Aruba tin pa yuda hende cu menos recurso, haya un tereno pa construi nan vivienda.
E forma cu Selene Kock a lansa su mes como candidato di partido AVP, ta duna un impresion cla cu si e kier e por cumpra un tereno. Pues, sigur no tin motibo urgente pa Prome Ministro Wever-Croes pidi departamento envolvi haci un excepcion pa Selene Kock a base por ehemplo cu el a keda sin un dak riba su cabes dor di un calamidad.
Cu ley ta sumamente estricto ta bini dilanti den e realidad cu e persona cu pidi un politico un tereno, tambe por wordo considera di ta habri porta pa hende por trapa riba ley,
Nos pregunta ta keda awor pakico Selene Kock no a cana e caminda cu tur hende mester cana y cu e mester conoce como politico di AVP, cu ta sigur maestro riba e tereno aki, pa e haya tereno?
Kico lo a pasa si Prome Ministro Wever-Croes lo a intermedia pa Kock haya tereno? Kico Kock lo a haci cu e intermediacion aki?
E loke Prome Ministro Wever-Croes a trece dilanti, ta algo sumamente serio cu mester haya mas atencion.
No ta sin mas Prome Ministro Wever-Croes a trece e caso aki dilanti. El a haci esaki a base di e descargo di Kock contra su persona, sin ningun midi, cu a sorprende tur hende.
Awor kico lo a pasa si Kock a haya tereno? Pakico durante e pandemia cu Kock como dokter di pulmon mester a atende cu Wever-Croes, nunca Kock a bati alarma contra Wever-Croes?
E asunto aki a base di nos leynan ta sumamente alarmante y mester haya clarificacion.
DIARIO lo sigui indaga riba e asunto aki pasobra cu e caso tereno hayando tur atencion, e hecho cu un candidato di AVP a bay pidi Wever-Croes pa un tereno, ta haya un sabor sumamente amargo den boca di ciudadanonan cu ta sigui regla pa haya tereno.
