ORANJESTAD (AAN) — Un asunto cu a cuminsa cansa pueblo ta, e hecho cu candidatonan cu presenta pa Parlamento ta trece dilanti cu nan ta postula nan mes riba lista pasobra nan kier sirbi nan pais.
DIARIO ta haya hopi reaccion di personanan cu ta splica cu tur hende kier sirbi nan pais y hasta tin e deber pa sirbi nan pais a base di tur forma di bida cu tin na e pais.
Mas y mas miembro di comunidad ta di opinion, cu exigencianan pa hende drenta Parlamento mester cambia pa asina contenido wordo duna na trabou di Parlamento.
Hopi votado a puntra nan mes si Parlamento no a bira trapi pa hende subi den bida social y si e salario y beneficionan di miembronan di Parlamento no ta habri wowo di hende cu solamente ta mira nan beneficio.
Cu mester mara participacion na Parlamento na leynan mas estricto, sigur ta un deseo cu ta biba cerca Pueblo pa loke ta trata e base moral cu na 2021 a alcansa punto cero.
Aruba no ta di acuerdo cu dos partido, AVP y POR, tin sospechoso riba nan lista mientras no tin exigencia firme.
Pakico vota, ta un pregunta cu hopi hende ta haci nan mes ora nan tuma nota sigur di informacionnan cu ta indica con Parlamento mes a permiti Aruba zink durante Gobierno Mike Eman cu aprobacion di asuntonan y un falta total di control.
Segun ta bini dilanti cerca ciudadanonan, candidatonan no mester splica con nan ta bay goberna pero con nan ta bay controla gobierno y con nan ta bay cumpli cu e tarea di Miembro di Parlamento cu Ley ta duna un arma masha poderoso pa controla e pais.
Remarcabel ta cerca votadonan cu candidatonan pa drenta Parlamento ta crea e opinion cu ta den Gobierno nan kier ta pasobra nan ta e persona yama pa sirbi Aruba como gobernante.
No ta bini dilanti kico nan ta pensa cu nan por haci den Parlamento mes, loke ta haci cu e candidato no ta pidi voto di Pueblo pa drenta Parlamento pero pa e sigui pa bira gobernante.
Hasta den publico mas y mas por mira con candidatonan kier profila nan mes como salbador di Aruba pero no kier bisa con nan por traha den Parlamento caminda eleccion ta pone nan na prome luga.
Mester bini debate con candidatonan riba lista kier mira Parlamento funciona miho y con nan aporte lo ta.
Segun informacion den e ultimo periodo di gobernacion (di cual Parlamento ta un parti importante) Mike Eman a duna e ehempel cu Parlamento no tin balor aunke ta Parlamento ta dirigi trabou di Gobierno na nomber di Pueblo.
DIARIO lo sigui amplia riba e pensamentonan di Pueblo, leynan cu ta atende cu eleccion, Parlamento y Gobierno y e cambio cu Pueblo kier mira den actitud di candidatonan enfrente Parlamento.
