Encuanto awa di Bubali Plas cu ta bay lama: --- ORANJESTAD (AAN) – Director di DOW, Ing. Marlon Croes, a señala den conferencia di prensa cu e Planta di Bubali Plas tin su reto tecnico door di mal mantenimento,
y por consiguiente no por produci y deliver awa den e normanan cu DOW ta desea di haci’e y ta busca constantemente, ora e ta sali di e planta y drenta den Bubali Plas.
“Pero Bubali Plas riba su mes, tin un trabao y funcion di naturaleza, cu e ta filtra e awa prome cu yega. Bisando esey, nos a ripara cu hopi ‘waterhyacint’ ta crece den Bubali Plas, y 80% di e superficie di e awa ta tapa cu e waterhyacintnan aki. Consecuentemente, esaki ta degrada e calidad di awa den Bubali Plas mes”, Marlon Croes a señala.
Croes a duna di conoce cu aworaki mes, DOW ta bezig cu Parke Nacional Arikok, trahando un plan pa nan por cuminza kita e ‘waterlilies’ aki pa haci e awa mas grandi cu solo por yega den dje y 'photosynthesis' tuma lugar pa e haya mas oxigeno y asina purifica su mes. El a reitera cu nan tin control y balansa prome cu habri e sluis, y esey kiermen cu nan por tin confianza tambe cu Bubali Plas ta haci su trabao di yuda filtra e awa, como e di cuater stage.
Den e caso aki, DOW tin un bon partnership cu otro departamento di gobierno, DVG specificamente. DVG tin un protocol, un programa di midimento na diferente lugar strategico di awa, y esaki ta sosode a base mensual, y tur e testnan aki ta sali bon den e ultimo añanan.
Director di DOW a indica cu a base di e noticia cu a sali Diabierna anochi, a pidi DVG pa haci un midemento di awa di awa, y nan a saca un muestra grandi pa 11.30 or di anochi, y despues e equipo di DOW, DNM, DVG y PNA a sinta Diasabra, y eynan nan a palabra un plan di accion, pa midimento atrobe, pa controla e calidad di awa cu a bay lama.
E resultadonan a drenta Dialuna y Diamars, y nan tur ta segun norma. Kiermen, no tin un riesgo halto bacteriologico pa cu salubridad publico di e usuarionan di lama.
