Biblioteca Nacional cu Exposicion dedica na Libertador Betico Croes

ORANJESTAD (AAN) – Señora Glenda Zavala-Maduro, funcionario di Biblioteca Nacional, den entrevista cu DIARIO a elabora tocante e preparacion di un exposicion cu lo tuma lugar na BNA,

for di mañan, dedica na Libertador Betico Croes. Esaki den cuadro di celebracion di su fecha natal, diamars 25 di Januari en curso.

Glenda Zavala a duna di conoce cu esaki ta un iniciativa di su persona, ya cu Biblioteca a pone den su man bek e actividadnan pa mucha, anto nan ta bezig ta wak si por haci mas tanto actividad posible, pa mucha.

El a bisa cu Diaranzon pa casualidad, e tabata tin un “kids club”, unda e muchanan tabata di bishita y el a haci un exposicion chikito, den sala di actividad, pasobra el a conta e historia di Betico, anto el a dicidi di haci un expo unda e publico por drenta, y entrante awe e bishitantenan por drenta saca potret di dje.

Durante e “kids club” ora el a conta e historia di Betico, el a scoge e parti di literatura, deporte, y cultura unda cu Betico tabata “all out” cune, y e muchanan a gusta masha hopi. E actividad tabata hopi leuk y e muchanan a mustra hopi interesa.

Biblioteca a pone un video den television, unda ta conta e historia di Betico cual ta bay keda draai te despues di dia 25. Y pa e exposicion “Ken ta Betico” nan falta ainda pa pone e titulo, Glenda Zavala- Maduro a bisa.

El a acentua cu e exposicion aki no ta su so a bin cune, el a haya cooperacion di mayoria di su coleganan y pesey e ta hopi contento. Tur ta material di Biblioteca mes, y Glenda mes tin un par. Su tata semper tabata un bon amigo di Betico, y e tabata tin su cosnan warda, incluyendo un bandera hopi grandi, pero e no tin espacio pa pone. Esaki ta e prome bandera cu na 1977 a wordo lanta na Wilhelmina Stadion.

E exposicion aki ta, tanto pa e muchanan cu ta bishita Biblioteca Nacional, como pa tambe pa mayornan y hende grandi cu kier bin aprecia esaki, y nan ta bon bini na BNA.