Restaurants y Dining ta keda como e categoria principal den gasto cu US$58 miyon

A.T.A. ta comparti resultado di mei 2025

*Cifra di patronchi di gasto di carchi VISA durante e prome kwartaal 2025 

ORANJESTAD (AAN): Den e promer kwartaal di 2025, 296,601 VISA cardholder di 134 pais cu a gasta mas di USD $201+ miyon na Aruba, representando un aumento di 8.8% den total di benta compara cu promer kwartaal di 2024.

            E aumento aki ta representa un subida di 7% den cantidad di cardholder y un crecemento di 10.4% den volumen di transaccion, mientras cu retiro di cash a yega US$17 miyon. Gasto pa cada cardholder a crece cu 1.9% compara cu mesun temporada 2024.

            Restaurants y Dining ta keda como e categoria principal den gasto cu US$58 miyon y un aumento di 11.2%. E siguiente categoria ta Hotels & Lodging cu US$49.6 miyon y un aumento di 12.8% cu ta exclui e pago pre-paid promer cu a yega Aruba. Na tercer luga ta Retail cu US$43.3 miyon y un aumento di 2.5%.

            A base di e ultimo forecast, e cantidad di turista pa Aruba lo por mustra un subida di minimo 5% na fin di 2025 (stay-over arrivals), cu tur region (NA, LATAM y EU) mustrando un crecemento compara cu 2024. 

ESTADISTICA CONFORME ACTUALISACION DEN E INDUSTRIA DI TURISMO:
Crecemento di 5.3% den stayover pa mei 2025 compara cu mei 2024 

            Den mei 2025, Aruba a ricibi un total di 117,125 turista “stayover”, representando un crecemento di 5.3% of 5,945 bishitante adicional compara cu mei 2024. E crecemento ta notabel den mercado Latino Americano, particularmente for di Argentina cu un aumento di 155.6%, Brasil cu 51.8% y Peru cu 21.4%. For di Norte America, a registra un aumento di 3.0%. Canada tin un crecemento di 41.3%. 

MERCADONAN Y PARTICIPACION DI E MERCADO
            Den mei 2025 e total di bishitante “stay-over” for di Norte America ta 78.4%, sigui pa 14.2% for di Latino America y 4.6% for di Europa. A pesar di un leve caida di e mercado Britanico, e mercado Europeo cu paisnan manera Italia, Suiza y Belgica a demostra un crecemento modera. E total di estadia (nights) durante e periodo di mei 2025 a laga un aumento di 0.7% compara cu mei 2025. Por atribui e aumento na e fuerte crecemento di Argentina y Brasil, mirando e estadianan mas largo for di e dos paisnan aki. 

SHORT-TERM VACATION RENTALS (STVR)
            A.T.A. ta sigui utilisa e plataforma Lighthouse pa monitorea y analisa e sector di STVR, cu ta duna acceso na indicadornan importante manera e prijs averahe pa anochi, e ocupacion y un calculacion di e entrada cu esakinan ta genera. 

            Si compara mei 2025 cu mei 2024 por wak cu e nivel di ocupacion promedio di STVR a subi cu 1.1%, for di un averahe di 51.8% den mei 2024 pa un averahe di 52.9% den mei 2025.