Di e forma aki WEB Aruba NV a honra diez Tata

ORANJESTAD (AAN): Specialmente relaciona cu Dia di Tata, e profesionalnan di WEB Aruba NV

a dicidi pa organiza un encuentro pa asina laga un grupo wordo aprecia cu e tarea di ta tata, y alavez cera conoci cu e mundo di awa y energia.

   Cu esey den mente, WEB su departamento di Servicio na Cliente riba Diahuebs siman pasa a organisa un encuentro cu diez Tata cliente. A scoge e tatanan via WEB su sistema di administracion di cliente ‘at random’ y a invita nan pa e sorpresa.

   Despues di un introduccion cortico di gerentenan di e departamento, e tatanan a ricibi un Certificado di Regalo di Cena pa 2 persona, hunto cu un ‘goodie bag’ di WEB pa bay disfruta na un manera special riba Dia di Tata.

   E di dos parti di e encuentro a encera un tour den plantanan di awa y energia di WEB pa cual e tatanan a keda hopi impresiona. Un pabien grandi ta bay pa tur nos tatanan stima di Aruba. Cu e gesto aki WEB ta aprecia nos tatanan cu semper ta traha duro pa hiba nos Aruba dilanti.