Desaroyonan mundial ta entrega Gabinete Wever-Croes 2 un mandato - *Situacion actual ta exigi continuacion di e maneho di crisis di Wever-Croes - *Gobernacion di Gabinete Wever-Croes 2 mester inspira futuro generacionnan
ORANJESTAD (AAN) — Ayera oficialmente Aruba a wordo informa di e personanan cu lo forma gobernacion diario di e pais como Ministro. Esaki a nifica cambio den e Parlamento di Aruba, cu ta e ala legislativo den e Trias Politica.
Representantenan di Pueblo di Aruba tanto den Parlamento como den Conseho di Ministro, lo tin tareanan mucho mas pronuncia cu cualkier constelacion anterior di Conseho di Ministro of di Parlamento a conoce.
Na 2017 e prome Gabinete Wever-Croes mester a asumi responsabilidad pa un pais cu un base financiero destrui dor di e debe nacional y otro debenan cu Aruba mester a paga manera e proyectonan PPS.
Ya for di 2017, e confiansa tambe cu un parti importante di ciudadano tabata tin den politica, a baha debi na e resultadonan pa e pais, cu na 2015 a perde su autonomia pa cual tanto Aruba a lucha ora Hulanda a impone supervision.
Central den e gobernacion di 2017 tabata e figura di Prome Ministro Evelyn Wever-Croes cu a presenta su mes den e periodo dificil di 2017 pa 2021 como un gerente di crisis, un gobernante cu a papia palabra cla cu e Pueblo di Aruba cu asina a bandona e politica di fantasia pa e pais a cera conoci cu un politica y gobernacion responsabel.
Aruba tabata na caminda pa soluciona su problemanan grandi na 2020 cu e prome presupuesto cu tabata cera cu un saldo favorabel, ora e coronavirus nobo a presenta pa basha mundo abou.
Awe ta den un lama sumamente bruto, Gobierno Wever-Croes 2 lo mester reemplasa e Gobierno Wever-Croes 1.
Olanan grandi di e situacion financiero y economico mundial cu e Pandemia Covid-19 a ocasiona, ta alcansa Aruba tambe.
Medidanan mester wordo tuma y den esaki Aruba mester acepta cu e mester di yudansa di Reino pa asina restaura e Status Aparte, e autonomia cu na 1983 a wordo logra dor di e politico mas grandi cu Aruba a yega di conoce, cu tabata Betico Croes cu a logra realisa e anhelo di Aruba.
Awe e lucha di Status Aparte mester inspira pa entrega politico total den cual Pueblo ta wordo prepara pa un epoca den cual e bandera di Aruba mester guia e pais na un epoca nobo di un Status Aparte caminda, mescos cu tabata e realidad tempo di Betico Croes, Pueblo tin confiansa cu gobernantenan lo hiba Aruba na un futuro nobo.
E tarea cu ta spera Gobierno Wever-Croes 2 no ta facil. E contenido ta pisa pero hopi lo depende di e accionnan di e gobernantenan, cu mester tene na consideracion cu Gobierno Wever-Croes 2 ta asumi responsabilidad pa e pais na momento cu Husticia ta persigui ex gobernantenan cu hasta a haya asiento den Parlamento, loke ta causa herida profundo cerca Aruba, cu den e concepto di Status Aparte a graba e palabra “integridad”.
E gobernacion di Gabinete Evelyn Wever-Croes mester inspira un generacion nobo di Arubiano den un pandemia cu a mishi cu soñonan di hopi hoben.
Gobernantenan nobo mester crea aliento pa un Pueblo y sigur pa e hobennan pa asina hunto Aruba restaura e autonomia di e pais den ‘Nomber di Dios” pa uza e palabranan cu Prome Ministro Evelyn Wever-Croes a expresa y cu duna curashi na e Pueblo di Aruba, cu mester sigui cana pa yega un futuro nobo.
