Premier Wever-Croes a anuncia nomber di ministernan y nan respectivo carteranan

 ORANJESTAD (AAN) – Minister Presidente Evelyn Wever Croes a menciona cual ta e ministernan cu lo integra Gabinete Wever-Croes pa e periodo 2021-2025, y a defini un tiki e funcion di cada un.

- Ursell Arends: Integridad Naturaleza, Transporte y Cuido di Grandinan, y a la vez, Vice Prome Minister.  “E lo enfoca riba e retonan den cada un di e areanan aki den e tempo nos dilanti, cu mester bay man den man cu e desaroyo di nos pais”.

- Xiomara Maduro:  Finanzas y Cultura. “Den e situacion financiero dificil cu nos ta, cu retonan grandi nos dilanti, cu lo ta increiblemente grandi, nos a scoge pa e experiencia di e ultimo añanan aki. Xiomara Maduro, alavez lo ta e di dos Vice-prome Minister”.

- Geoffrey Wever:  Economia, Comunicacion y Desaroyo Sostenible. “E exito di nos recuperacion como pais, lo depende di nos desaroyo economico; con resiliente nos por haci nos por haci nos pilar economico, di berdad. E ultimo añanan nos a traha riba un maneho, e fundeshi y awo nos mester bay ehecute”.

- Rocco Tjon - Husticia y Asuntonan Social. “Cu su preparacion riba area di Husticia y combina cu Asuntonan Social, lo wordo enfoca mas riba prevencion”.

Minister Presidente a declara cu señora Vanessa Tjon- Kock, casa di señor Rocco Tjon, actualmente Korpchef, lo laga e funcion aki temporalmente, pa e periodo di e Gabinete aki y lo ta encarga cu otro funcion. Esaki pa evita cualkier impresion di conflicto di interes cual pa su Gabinete ta hopi importante, den cuadro di integridad. Su funcion nobo ainda no a wordo anuncia.

- Endy Croes:  Enseñanza y Deporte. “Un persona cu un pasion y dedicacion inmenso pa su trabao, pa mucha y pa hoben; cu semper ta scucha tur actor den e tereno di enseñanza y cu lo sa di aplica esaki, pa meneha esaki, trahando cu profesionalnan den e area aki y treciendo trankilidad y mi lo tey pa yuda, caminda cu tin mester”.

- Glenbert Croes: Labor, Integracion y Energia. “Aki nos a pone dos cartera: labor y integracion hunto, pa alinea e maneho y acelera e proceso. Inversionistanan y companianan local cu a aplica pa permiso, mester haya contesta rapido. Un si of un no, pero rapido y den tur transparencia.  Y e minister lo tin un reto cu esaki, y e lo ta encarga tambe cu nos maneho di energia”.

- Dangui Oduber: Salubridad Publico y Turismo. “Aki tambe nos a scoge pa continuidad y experiencia pasobra ambos cartera ta esnan mas afecta door di e pandemia y e retonan ta grandi; y experiencia di ultimo añanan ta hopi necesario den e temporada nos dilanti”.

- Guilfred Besaril, Minister Plenipotenciario na Hulanda. “Especialmente cu e negociacionnan cu Hulanda y e proceso di leynan di Reino, nos mester di continuacion. Su nombracion lo cana un otro procedure y e lo huramenta un dia despues di e otro ministernan”.

            “Ami mes lo ta encarga cu asuntonan general, innovacion, organizacion gubernamental, infrastructura y planificacion teritorial , y alavez Prome Minister.

            Pa Parlamento nos ta propone Edgar Vrolijk como presidente di Parlamento. Su profesion ta docente y un Hurista. Y cu conocimento di nos Constitucion, ley y reglanan, combina cu su experiencia den Parlamento, e lo sa di guia nos Parlamento na un forma fuerte den e siguiente cuater añanan aki”,   Premier Wever-Croes a señala y a enfatiza cu ta cu un orguyo inmenso e ta presenta su Gabinete Wever-Croes II.