Mundo a observa un dia dedica na e asunto mas esencial di hende - *Tecnica moderno a habri porta pa tera infertil produci cuminda - *Situacion mundial ta entrega mundo un reto pa hende sobrevivi
ORANJESTAD (AAN) — Ayera tabata e dia special cu anualmente ta wordo observa pa haci hende realisa e importancia di agricultura, cu tin relacion directo cu bienestar di hende.
Lamentablemente e agricultor cu ta ocupa un lugar central den e necesidadnan humano, a wordo menosprecia sigur durante Siglo 20, ora industrialisacion a haci cu cantidad di campesino talentoso a dicidi cu nan kier un trabou den mundo industrial of den oficina.
Di e forma aki hende a lubida e importancia di produccion di cuminda cu ta depende di pesca, cria of agricultura.
E momento a yega pa duna un contenido nobo na e importancia di produccion di cuminda y sigur na agricultura, cu ta produci ingredientenan necesario pa e plato di tur dia cu mester alimenta hende.
Hamber y miseria ta resultado directo di falta di produccion di alimento, cu antes tabata depende di cantidad di factornan, cu mientrastanto ciencia moderno a yuda hende soluciona.
Pa Aruba esaki ta hopi importante pa motibo di e clima y e suelo cu mester di ayudo contra infertilidad.
Na e momentonan aki, mundo ta pasa den un etapa crucial den cual hende ta wordo mustra riba realidadnan cu hende kier a lubida, ora bonansa y supuesto progreso a pone hende lubida tur base di su realidad.
Covid-19 na diferente forma ta papia un idioma cla cu hende, cu kier of no kier, mester dal algun pasa atras pa alcansa un normal, cu ta wordo considera un normal nobo pero ta realmente un normal mas normal cu e mundo artificial cu hende a construi durante Siglo 20 durante cual valor robez a reemplasa loke ta basico pa hende.
Awe mester restaura e lugar real di agricultura den un comunidad y mester cuminsa educa un generacion nobo, cu a crece cu e pensamento importa y cu no ta cuadra cu realidad di bida.
E pandemia mundial Covid-19 tabata tin impacto na diferente forma riba produccion di alimento. Na prome luga, cantidad di agricultor a bira victima di e malesa mientras cu e necesidadnan basico pa produccion tambe a wordo afecta.
Na momento cu mundo a tuma nota di e pandemia, a cuminsa papia di e necesidad grandi cu e lo por crea pa e produccion di cuminda, manera DIARIO for di inicio di e pandemia a informa Aruba.
Actualmente desempleo ta uno di e problemanan grandi na mundo. Na mes momento desempleo ta recorda hende, cu un dia campo a wordo bandona pa bay sinta den oficina caminda hende no por produci loke e mester pa alimenta su mes y asina biba.
Agricultura mester haya un luga pronuncia den comunidad mundial y local sigur si tene na consideracion e progreso di hamber y miseria debi na e impacto social rond mundo.
Hamber y miseria cu ta urgi hende pa bolbe campo. Bolbe sembra cunuconan bandona.
E situacion mundial awe ta entrega hende e oportunidad di trabou den agricultura cu mester produci e pan di cada dia di hende.
Awe e importancia di e campesino ta wordo skirbi dor di un situacion mundial, cu ta urgi hende pa duna balor na produccion di alimento, hunto cu awa limpi e necesidad basico di hende pa por biba riba planeta tera!
