Ansia pa puesto den Conseho di Ministro por bira continuacion di maniobra Mike Eman - *21 Miembro di Parlamento cu derecho exclusivo ta representa democracia y autonomia - *Alma, cultura, dignidad, mentalidad y balornan di e Arubiano mester dicidi pa Aruba
ORANJESTAD (AAN) — Ora tuma nota di loke ta pasa den mundo politico di Aruba na caminda pa eleccion, preocupacion grandi ta nace.
Na 2021, na un punto historico pa mundo y pa Aruba, e ansia politico cu mester conduci na expresion di Pueblo den eleccion, ta mas bien dirigi riba e pregunta, cual di e politiconan ta mas importante, mas sabi, hasta mas astuto, pa bay sinta den Conseho di Ministro caminda nan ta kere cu nan por bira rey.
Esencia di eleccion pa Parlamento, de facto henter e realidad di nos sistema democratico ta basha abou mientras e forma cu 21 persona ta pensa di bay haya un salario den servicio di Pueblo den Parlamento, practicamente no ta bini dilanti.
Aparentemente bira representante di Pueblo, bira miembro di Parlamento, no tin ningun importancia pasobra ta ministro tur hende kier bira, aunke ser ministro ta depende di e miembronan di Parlamento.
Durante e periodo di gobernacion 2017-2021, Aruba a registra un situacion di dualismo nunca bisto.
Na momento cu Hulanda ta exigi pa tuma medidanan pa pone un fin na e abusa cu Pueblo di Aruba a conoce cu e forma cu politiconan sin concenshi a spart placa di Pueblo, protesta ta cuminsa pasobra poder ta di Parlamento.
Ora Prome Ministro Evelyn Wever-Croes tabata negocia den un pandemia pa asistencia Hulandes, mundo politico a haya un ocasion pa haci wega cu un autonomia, cu mundo politico di Aruba mes no ta respeta.
Boca grandi politica oportunista den mayoria di caso, tabata papia di e posicion singular di Parlamento como Voz di Pueblo. Pero kico a pasa cu Voz di Pueblo ora Mike Eman cu 8 Mil voto a nenga di drenta Parlamento?
Nos no ta papia mes di Daphne, cu a bay cu asiento di e partido cu a habri porta pa e drenta Parlamento.
Otro siman Aruba mester vota pa Parlamento, cu ta e centro di e Estado di Derecho Aruba. Ta den Parlamento Ley ta bira realidad. Nada por pasa na Aruba sin e autorisacion di 21 Miembro di Parlamento cu mester hura cu nan ta traha na interes di nan pais y ta honra nan pais.
Un miembro di Parlamento ta ricibi un pakete exclusivo di derecho pa e por representa e Pueblo di Aruba, di cual e mester duna prueba cu su accion cu e por representa.
Un miembro di Parlamento di Aruba ta e Voz di Aruba, cu ta resona pa defende y proteha e Pueblo di Aruba, e caracter, pakete di balor, cultura, tur loke ta Aruba.
Un persona por tin Mil diploma, pero e mester por expresa e alma Arubano ora e ta fungi como Voz di e Pueblo di Aruba, cu ta e honor mas grandi cu por tin.
Ta Parlamento, como e Voz di Aruba, ta scoge Miembronan di Conseho di Ministro cu mester haci loke Parlamento ta dicidi. Parlamento tin e derecho di inmunidad, cu ta haci posibel pa solamente e balornan di decencia y integridad di Aruba, stroba su ponencianan na defensa di Aruba den sala di Parlamento.
E Miembro di Parlamento ta dicidi riba cada cent cu wordo gasta di Pueblo y riba tur loke mester bira base di exigencianan di e pais.
Awor pakico hende no kier drenta Parlamento, cu ta e autorisacion directo cu nan ta haya pa sirbi Pueblo? Pakico ta Minister tur hende kier bira?
Atrobe nos mester puntra pakico den debate no ta papia di loke mester wordo haci pa mehora calidad di e representacion di Pueblo di Aruba?
Berdad di e sistema politico ta, cu mientras e ta base di democracia tambe e ta un forma facil pa hende subi e trapi social y di poder den comunidad.
Si un empresa tin exigencia grandi pa su gerencia, e exigencianan pa funciona como Ministro historicamente a laga di desea.
Sinceridad ta exigi pa no bandona e realidad cu dia 25 di Juni Aruba ta vota personanan cu lo bira Voz di un Pueblo, cu nan mester por representa den tur aspecto pa asina como Pueblo cu su propio identidad, por sigui cana den futuro.
