Respaldo y Fundacion Mama Ties ta uni forsa pa realisacion di clinica nobo pa Salud Mental

ORANJESTAD (AAN):  Fundacion Salud Mental Aruba Respaldo tin como meta pa sigui brinda cuido di salud mental di calidad halto na comunidad di Aruba.

Pa por sigui cumpli cu e necesidadnan actual y futuro di nos comunidad, Respaldo, den colaboracion cu Fundacion Mama Ties, ta trahando riba e preparacion pa realisacion di un clinica completamente nobo y moderno. 

E infrastructura actual di Respaldo, situa banda di Hospital, tin casi 40 aña y ya no ta suficientemente adapta pa acomoda e demanda creciente y e desaroyonan den cuido di salud mental. Ademas, actualmente Respaldo ta brinda su servicionan for di dos localidad diferente, algo cu no ta optimal ni pa e organisacion ni pa e prestacion integral di cuido.

Pa atende e necesidad aki, Respaldo a firma un convenio di colaboracion cu Fundacion Mama Ties algun tempo atras, cu e meta di uni forsa pa haci realisacion di e proyecto importante aki posibel. E intencion ta pa construi un edificio completamente nobo, moderno y funcional, ekipa cu tecnologia avansa y diseña specificamente pa e necesidadnan di cuido di salud mental. E meta ta pa eventualmente reuni e diferente servicionan di Respaldo bou di un solo dak, creando un ambiente cu ta facilita colaboracion, eficiencia y mas importante ainda, cuido di calidad pa e cliente. 

Como parti di e fase preparatorio, e compania Hulandes TwynstraGudde a wordo contrata pa compila un ‘Programma van Eisen’ (programa di rekisito). E documento aki lo defini e rekisitonan funcional, tecnico y organisatorio cu e edificio nobo mester cumpli cu nan y lo forma e base pa e siguiente fase, unda e architecto por inicia cu e diseño. 

Den siman di 5 pa 12 di augustus, un team di TwynstraGudde tabata na Aruba pa reuni cu diferente stakeholder y cu e team di Respaldo. Durante e encuentronan aki, nan a colecta informacion y input relevante for di e diferente parti involucra, pa asina e necesidadnan di e cliente, profesionalnan y e organisacion por wordo incorpora den e planificacion di e edificio nobo. 

Den e mesun momento, Departamento di Infrastructura y Planificacion (DIP), cu ta resorta bou Ministerio di Infrastructura, ta atendiendo e proceso relaciona cu otorgamento di e tereno necesario pa realisacion di e proyecto. 

Respaldo ta expresa su gratitud na Fundacion Mama Ties pa nan sosten, confiansa y compromiso cu e proyecto importante aki. E colaboracion ta un ehempel di con, door di uni forsa, por sigui inverti den un futuro unda cuido di salud mental di calidad ta accesibel y prepara pa atende e necesidadnan di comunidad di Aruba. 

Di robes pa drechi: Marlon Croes (Fundacion Mama Ties), Lars v/d Horst y Simone Swartjes di TwynstraGudde, Uka Boekhoudt (Respaldo), Minister Infrastructura, Energia y Telecomunicacion Gervais R. Herdé, Caroline Hart (Respaldo) Fito Croes, dr. Tico Croes y Isabella Croes di Fundacion Mama Ties.