Frans Ponson di CUA:
ORANJESTAD (AAN): Den e ultimo lunanan cu a pasa, por a tende hopi hende den comunidad ta keha. A tende Taxistanan mustra con malo camindanan ta dilanti Hotelnan, y tambe e caminda cu ta bay pa Malmok y Arashi. Y awor ta Comerciantenan Uni di Aruba (CUA) ta bati alarma, riba tardanza cu atende mapa y duna bouwvergunning na DOW... y tambe cu careteranan di Aruba (excepto WVB Boulevard y Green Corridor) ta na werki.
Frans Ponson, President di CUA a indica cu e situacion na DOW a bin cu tur Gobierno di ultimo decadanan. “E ta algo strategicamente cu ningun hende no kier atende e Departamento di DOW aki, y tin di busca un solucion pa esaki,” Ponson di CUA a declara.
El a splica cu Ministro ta responsabel pa tuma accion den DOW. Pasobra loke nan ta mirando, ta algo cu a bin ta socede sistematicamente pa hopi aña caba. Y ta hopi negativo pa un entrepreneur nobo ta haya placa fia, pa lanta su negoshi pero na DOW e ta keda pega y hamas a haya su permiso. E entrepreneur aki a perde tur su placa, y asina DOW ta yuda kibra e entrepreneur aki su moral, y lo no kier habri negoshi nunca mas, y ta bay traha ‘zwart’ pa resto di su bida.
CUA a splica cu tin hende cu ta bishita DOW tur dia, tur dia nan ta bay na balie pa keda grita y exigi nan vergunning... y nan ta logra hay’e tambe! Pero un Arubiano esey no ta nan estilo di bay tur dia na bali.
E cantidad di keho cu CUA ta hayando ta bastante! Awor ta pueblo tin di lanta pa asina exigi Gobierno pa drecha DOW, pa cuminza drecha tur caminda, drecha e proceso di sikiera duna contesta. Si acaso bo shocks di auto a daña... manda cobra DOW tambe pa esey. E ora kizas por mira cambio lo por wordo introduci.
