Consul di Colombia Gustavo Serrano satisfecho:
ORANJESTAD (AAN) Riba Diadomingo e di dos ronda di votacion pa eligi President y Vice-president nobo di Republica di Colombia, pa e siguiente cuater añanan, a tuma lugar y manera a sosode durante e prome ronda, tabata e caso den e di dos ronda tambe.
E residentenan Colombiano aki na Aruba a haya oportunidad di sigui den e proceso y e votacion a cuminza Dialuna siman pasa te cu Diadomingo ultimo, den Cas di Cultura.
E Consul General di Colombia na Aruba, señor Gustavo Serrano, den entrevista cu DIARIO, a duna di conoce cu den e curso di e siman te cu Diadomingo un average di 2400 persona a acerca na e urnanan electoral, y esaki ta un cantidad importante. Cada dia a acerca un 400 persona, y e proceso a tuma lugar na un forma ordena, civico y pacifico. E proceso a bay na un manera transparente, sin ningun dificultad.
E votacion a cuminza pa 8’or di mainta y a termina pa 4’or di atardi. E afluencia riba Diadomingo tabata hopi mas grandi cu den e dianan prome di Dialuna pa Diasabra.
“Nos ta spera cu den e transcurso di e dia e personanan cu ainda no a vota pa motibo di trabao of otro circunstancia a logra bin eherce nan derecho di voto”, Consul Serrano a bisa. Esaki debi cu 4’or net, net, e urnanan a wordo cera. Solamente a vota e personanan cu pa 4’or di atardi a entrega caba nan cedula na e miembronan di Hurado. Esnan cu a yega 4’or y tabata tin rij den e mesanan no por a eherce nan derecho na e voto debi cu pa 4’or exacto mester a cera e urnanan. Consul Serrano a mustra si, hopi satisfecho, con e proceso di votacion pa elegi President y Vice-president nobo di Colombia a tuma lugar aki na Aruba.
{gallery}Residentenan na Aruba a vota den di dos ronda na un manera ordena, civico y pacifico{/gallery}
