ORANJESTAD (AAN): Presidente di Comision Permanente di Husticia di Parlamento di Aruba, parlamentario John Hart,
a anuncia cu e ta solicita un reunion cu caracter prioritario pa trata e preocupante situacion relaciona cu e dificultad cu ciudadanonan ta experimenta pa haya acceso na proceso di inscripcion na Departamento di Censo y Registro Civil.
E anuncio ta sigui e reciente carta di preocupacion publica door di Ombudsman di Aruba, señora Jurima Bryson, den cual e ta alerta riba un problema cu segun su oficina ta limita acceso di ciudadano nan na un servicio gubernamental esencial. Segun Ombudsman, tin indicacion di un desbalansa structural entre e cantidad di peticionnan pa inscripcion y e capacidad disponibel pa procesa nan, loke ta resulta den periodo largo di espera y consecuencianan serio pa ciudadanonan.
Hart a indica cu e tema aki no ta algo nobo pa AVP.
“Como fraccion, nos ta sigui e desaroyo aki caba un tempo. Nos a ricibi diferente señal for di comunidad tocante dificultadnan pa haya cita y pa completa proceso di inscripcion. Awor cu Ombudsman, como institucion independiente, a confirma formalmente cu e situacion ta alarmante y a emiti un carta di preocupacion, mi ta considera cu e momento a yega pa un discusion formal y transparente,” Hart a declara.
Segun e parlamentario, e problema no ta afecta solamente personanan cu recientemente a ricibi permiso di estadia, sino tambe Arubianonan cu ta regresa Aruba despues di un periodo den exterior y cu mester inscribi nan mes atrobe. Sin inscripcion, ciudadanonan por confronta obstaculonan pa haya acceso na AZV, educacion, beneficionan social, trabou, servicio bancario, seguro y vivienda.
P’esey Hart ta solicita cu Director di Departamento di Censo y Registro Civil, señor Jurima Bryson, bin informa e miembronan di Parlamento tocante e estado actual di e situacion, e capacidad operativo di e departamento, e causanan di e atraso y e posible solucionnan cu ta considera.
“Parlamento tin e responsabilidad pa supervisa e funcionamento di nos servicionan publico. Si tin un situacion unda ciudadano nan no por haya acceso oportuno na un servicio tan basico y esencial, nos mester entende exactamente kico ta pasando y con e problema lo wordo atendi,” Hart a expresa.
E parlamentario a enfatisa cu e meta di e reunion no ta busca culpabel, sino haya claridad y identifica solucionnan concreto.
“Nos ta papia di un servicio fundamental. E preocupacion principal mester ta e ciudadano cu ta keda atrapa den un sistema cu no ta responde den un termino razonabel. E informe di Ombudsman ta un señal serio cu no por ignora,” Hart a indica.
Hart a conclui expresando su aprecio pa e trabou independiente cu Ombudsman ta desempeña y a enfatisa cu Parlamento mester tuma seriamente e observacionnan presenta.
“E informe y e carta di preocupacion di Ombudsman brinda un base obhetivo pa nos analiza e situacion. Awor ta momento pa e instancia nan concerni informa Parlamento y pa nos traha hunto na solucionnan cu pone e ciudadano na centro,” Hart a conclui.
