Directora di Santa Rosa, Nathalie Maduro:
ORANJESTAD (AAN) -- Manera ta conoci, Diadomingo 28 di Juni awo, lo tuma lugar e Fiesta di Cunucu 2026, na Santa Rosa, organiza pa Departamento di Adulto Mayor, den colaboracion di Departamento di Agricultura, Cria y Pesca (Santa Rosa), entre otro.
Den entrevista cu Nathalie Maduro, director di Santa Rosa, el a comenta na DIARIO, cu aña pasa e tabata hopi leuk, mas di locual nan a spera.
Nathalie Maduro a señala cu locual ta e realidad ta cu tin un envehecimento masha grandi na Aruba, y tambe den sector primario.
“Hopi di nos grandinan cu ta produci, manera e piscadornan, e cunukeronan, ta birando hendenan di edad halto, aunke cu ainda nan ta balente, ainda nan ta produci hopi, nos ta wak esaki como un manera pa trece e grandinan hunto cu e hobennan, pa nan tambe por tuma over e parti di e ofishinan aki, cu kizas den pasado tabata un parti hopi importante di nos cultura, pero cu tempo cosnan a cambia, nos a moderniza, pero nos tradicionnan ta keda importante, pues mi ta kere cu e evento aki ta ilustra esey. Trece e grandinan hunto cu e hobennan”, Nathalie Maduro a relata.
El a agrega cu si e casnan di hende grandi ta interesa di bay e evento cu nan miembronan, of cualkier club social ta desea di trece nan clientenan, nan ta bon bini.
“Nos ta bay tin tentnan special, y si por laga nos sa cu anticipacion y nos por hasta pone un area special pa esnan cu ta bin cu grandinan den rollstoel”, Directora di Santa Rosa a bisa.
“Loke tambe ta bunita ta cu nos kier mustra locual nos cumindanan tradicional ta representa, dus, si boso tin bishita cerca boso, trece nan. Pa esnan cu ta bisa cu nan tambe kier participa, cu nan kier bende cuminda, nan ta bon bini.
Exigencia cu nos tin ta cu nos ta pidi tur hende tin nan carchi berde, pero por tuma contacto cu señora Carola Geerman, na Santa Rosa, y e ta registra boso y ta duna boso mas informacion di kico ta e exigencianan pa participa. E participacion ta gratis, e ta mas bien un manera of un momento pa trece nos comunidad hunto, specialmente nos grandinan, y pa duna nan e balor cu nan ta merece”, Nathalie Maduro, directora di Santa Rosa a subraya.
El a reitera cu Minister lo reconoce cinco persona cual nombernan lo keda te aki como un sorpresa, pero señora Maduro ta sigur cu ora di tende nan nomber, lo compronde di con nan lo wordo reconoci Diadomingo 28 di Juni venidero durante e Fiesta di Cunucu 2026.
