Consul General na Aruba Luis Eludis Perez Delgado:
ORANJESTAD (AAN) – E Cuerpo Diplomatico di Republica Dominicana na Aruba, encabeza pa su Consul General señor Luis Eludis Perez Delgado, a celebra dia 27 di Februari awo, e di 181 aniversario di e Independencia di nan pais.
Consul Luis Eludis Perez Delgado, a comparti cu DIARIO algun palabra, relaciona cu e dia aki sumamente special pa Republica Dominicana y su pueblo, y logicamente pa e residentenan aki na Aruba.
Consul Perez Delgado a expresa cu esaki ta un fecha sumamente special pasobra ta celebra e di 181 aña di Independencia di Republica Dominicana.
“Y hopi bon cu nos ta celebre den un momento cu Republica Dominicana ta haya su mes den un situacion di progreso, di cambio, di mehoracion den loke tin di haber cu economia, educacion, paz social, un situacion den la cual Republica Dominicana ta coloca su mes den e Paisnan di Latinoamerica, den un di e prome lugarnan”, Consul Perez Delgado a señala.
El a agrega cu ta hopi bon cu nan tin un Presidente manera señor Luis Abinader, cu a sa di interpreta e papel cu ta coresponde na Republica Dominicana, y cu tin, como base fundamental, entre su asuntonan di planificacion y ehecucion diario hiba e politica internacional di Republica Dominicana, ehecuta atravez di e Ministerio di Relacionnan Exterior, cu ta dirigi hopi oportunamente, e Minister Roberto Alvarez, el a menciona entre otro.
El a agrega cu nan kier a organiza na Aruba un celebracion senciyo pero significativo. Y a invita tambe diferente figura politico di su pais, pa lubida pa un rato tur e colornan politico y cobiha nan tur bao e tres colornan di e bandera di Republica Dominicana: Cora, blow y Blanco.
