ORANJESTAD (AAN): Diahuebs atardi, e aerolinea cu ta creciendo mas rapido na Atlanta (Merca),
a anuncia expansion grandi, cu 40 porciento mas vuelo saliendo di eynan, y a agrega algun vuelo nobo bulando rutanan domestico, pero tambe dos ruta internacional nobo, incluyendo uno pa Aruba.
Frontier Airlines ta sirbi 52 destinacion, y riba Diahuebs anuncia nuebe nobo, incluyendo vuelo direct di Atlanta pa Aruba cu lo start na final di luna di Mei 2025. Tambe nan lo cuminza bula pa San Pedro Sula na Honduras cu lo start na comienso di Juni venidero.
Na hub principal y sede di operacion ta na Atlanta, unda nan cantidad di empleado ta creciendo pa 1.200 persona e aña aki, incluyendo piloto, personal di cabina, y mas.
Vuelo inaugural di $69: E vuelo pa Aruba lo bay ta uno semanal, y lo cuminza dia 24 di Mei 2025. Semper Frontier ta conoci pa su specialnan di pasashi di sea $29, of di $39, etc. Pa e vuelo inaugural di Aruba, nan lo ta ofreciendo un special di $69 unavez cu e wordo poni den nan red di reservacion.
“E expansion di Frontier ta alinea perfecto cu e mision di Aeropuerto di Atlanta pa sostene mas conexion, treciendo un impacto economico, y sigurando cu viaheronan tin mas opcion compara cu antes. Na Hartsfield-Jackson cu ta e Aeropuerto di Atlanta, nos no ta djis acomoda crecimento, nan ta prepara p’e, ta bay cune, y ta dune bon bini,” ta loke Jan Lennon a declara, kende ta gerente general interino di e Aeropuerto.
“Nos ta contento di uni cu e liderato na Aeropuerto di Atlanta pa significantemente crece nos operacion y trece mas opcion di vuelonan di costo abao pa clientenan di Atlanta. Nos pasashinan ta un promedio di 60% mas barata compara cu otro aerolineanan operando for di Atlanta,” ta loke James Dempsey a declara, kende ta president di Frontier Airlines. El a bisa cu entrante 2026, e aerolinea lo bay trece un opcion di asiento di First-Class tambe. E potret aki pa cortesia di Frontier Airlines.
