Presidente di Parlamento Marlon Sneek:
ORANJESTAD (AAN) — Presidente di Parlamento, señor Marlon Sneek, siguiendo cu su entrevista cu Matutino DIARIO, tocante e “preclearance” di Merca na Aruba, a duna di conoce cu e representante di Florida ta bezig cu un bill pa e “Western Hemisphere”, cu ta e parti cu Aruba ta cay den dje, pa haci inversionnan di 100 miyon dollar, den e area aki di mundo, pa desaroya diferente proyecto.
“Pasobra Merca tin diferente Parlamentario cu ta representa diferente hemisferio. Anto nan ta wak kico nan lo kier haci den e hemisferio ey. Y mirando e movecion cu Merca tin pa por tin mas presencia, no solamente den e caso aki di un preclearance, pero tambe e presencia di e inversionnan Mericano, pasobra Merca kier move den e mesun direccion cu China ta move”, Sneek a comenta.
Sneek a bisa cu manera ta conoci, China si ta hacie. Na diferente pais sudamericano, China a duna financiamento pa traha Metro, hospitalnan, aeropuertonan, brug, camindanan, etc. “Anto Merca kier move den e direccion ey tambe, pa nan ta esnan cu ta duna financiamento pa e proyectonan aki. Anto, e representante di e Estado di Florida ta bezig cu su factura di 100 miyon di inversion”, Marlon Sneek a señala.
El a agrega cu esaki ta informacionnan cu el a haya, y a cuminza papia cu nan, tocante kico ta e proyectonan cu nan lo kier haci y con Aruba lo por tap aden di un proyecto manera esaki.
Sneek a sigui splica cu tur hende conoce Merca como un pais cu ta keda den su plan energetico. “Y mirando cu e gobierno aki, mirando cu un di su gran sostenedornan a bin di parti di Texas, y nos sa cu Texas ta riba petroleo nan ta draai, kiermen cu e por bira cu nos tin oportunidad na Aruba toch, pa haci algo sea cu refineria of sea mas den e direccion di gas natural, cu gobierno anterior y esun prome cu ne, tabata tin e idea di bin cu plannan pa por baha nos gastonan pa loke ta produccion di energia electrico y awa potable. Pues, e ta algo cu Aruba por tap riba dje”, Parlamentario Sneek a expresa, indicando cu ta hopi tema el a trata durante su bishita na Washington.
