Parlamentario Shailiny Tromp-Lee:
Esaki ATA a informa parlamento den reunion di comision
ORANJESTAD (AAN): Diamars 2 di juni 2025, durante un reunion na Parlamento, ATA a duna un update importante riba e pronosticonan di e cifranan turistico di nos isla. Un luna pasa, e panorama turistico tabata trece cierto preocupacion pa nos, debi na señalnan no favorabel den e cifra di bishitante y reservacionnan. Sinembargo, nos por ripara cu den 1 luna di tempo tin un mehoracion den e ultimonan aki, algo cu ta duna un poco di alivio den un contexto aun fragil.
ATA a presenta un update detaya riba e pronosticonan di turismo pa e restante di 2025. Manera indica ainda 1 luna pasa tabatin cierto señalnan cu a causa preocupacion, pero e desaroyonan reciente ta mustra un mehoracion modera. Segun e presentacion di ATA, Aruba ta keda relativamente fuerte den un region caribense cu ta confronta un caida general den demanda turistico. Esaki no obstante tendencianan internacional preocupante manera inflacion halto, un mercado cambiante y insiguridad y preocupacion di recesion na Merca, cu ta nos mercado principal. Asina mes Aruba a logra mantene su posicion den top 5 destino Caribense.
Aruba ta keda enfrenta un situacion global insigur cu e sector turistico no ta imune pe. E ambiente ta cambia constantemente, cu factornan internacional, specialmente e maneho estadounidense, tin un gran influencia riba e desaroyo di turismo aki na nos isla. P’esey, e transparencia y ricibi informacion continuo door di entre otro ATA ta esencial.
Como presidente di e Commissie Financiën, Overheidsorganisatie, Cultuur en Sport (CFOCS), mi a expresa e necesidad di compromiso di parti ATA pa sigui tene Parlamento informa riba desaroyonan y pa nan presenta updates regularmente, particularmente ora cu por tin cambionan importante den e pronosticonan. Asina Parlamento por haci su trabou di supervision y control mihor. Monitoreo a base di cifra y pronosticonan sigur lo beneficia nos pais y hendenan. E reunion tabata constructivo y di balor, y como presidente di e comision, mi ta satisfecho cu e nivel di discusion y di colaboracion di esnan cu tabata presente.
Mi ta di opinion cu nos mester sigui ta alerto y proactivo den e defensa di nos interes turistico y di un desaroyo sostenibel di Aruba. Pesey mes mi ta contento di por a wak y scucha cu ATA ta sigui traha pa adapta nos strategia turistico den un mundo constantente cambiante.
