Rensell Lumenier honra como empleado di luna di Hospital

ORANJESTAD, Aruba – 27 di juli 2022: Tur luna Horacio Oduber Hospital (HOH) su enfoke ta pa elogia coleganan cu di un forma of otro ta destaca y ta bay e “extra mile”.

Pa luna di mei a toca turno pa colega Rensell Lumenier cu ta labora den cushina di hospital ne ‘afwaskeuken’. Su team di colega den cushina hunto cu e manager a nomin’e como empleado di luna.

Rensell no a spera di sali empleado di luna mes. Ela conta cu nan a bis’e cu e tin di bay su ‘functioneringsgesprek’  y ora ela yega el a hay’e cu sorpresa grandi. Esaki tabata algo cu e ta haya hopi fantastico. E ta conta cu loke e gusta di su trabou ta su coleganan, cu nan ta pone schouder hunto bou di e labornan diario. Nan meta di tur dia ta pa laba e cosnan di cushina, wea entre otro, pero tambe mantene henter e cushina limpi. E ta hopi gradicido na su super team cu a nomin’e y a organisa e bunita evento aki.

Hellen Fijten, chefkok, a conta cu Rensell ta un persona cu ta traha super duro. E ta masha flexibel y ta cambia warda ora mester. Hasta si nan yam’e pasobra mester di dje pa bin trabou di biaha, e ta presenta sin keha. Semper bo por conta riba dje. Separa di tur esey, e ta masha colegial.

E ta percura pa haci su trabou bon y hasta ta duna coleganan den otro funcion un man ora tin mester. Fijten a duna di conoce cu si algo a kibra of mester drecha, Rensell ta e persona cu hopi bes ta esun cu ta sali regla un ke otro mesora. E sa cu esey no ta parti di su trabou pero toch ta hacie di su mes.

E ta creativo y ta pensa riba solucionnan. E ta tuma un reto cu man habri. Laba tayo, traha dushi cuminda y haci reparacionnan, e ta haci di tur cos. Ademas, e ta un colega cu ta trece ambiente den cushina. Si ta scucha coleganan hari di leu, sigur ta Rensell a conta un joke.

Felicia Halman, manager di e seccion ‘voeding’, a bisa cu Rensell a cuminsa traha cu nan diescuater aña pasa den cushina. E ta un colega cu semper por conta cu ne. Hasta durante e tormenta, Rensell a pone su mes disponibel pa yuda hasta pa traha cuminda pa e boluntarionan y si coleganan no por a yega elo a tuma over. E ta un bon teamplayer y ta destaca den esaki masha.

Rensell ta un persona hopi alegre y ta trece hopi ambiente den e team mes. E gusta haci joke, cual ta algo hopi leuk di dje, pero na momento di haci su trabou, e ta eherce esaki cu un nivel halto di excelencia. Masha pabien di parti di coleganan di su team, Hunta di Directiva y HOH completo!