E ta den categoria 3 di sistema nobo introduci na Spaña
MADRID: Mundo a cera conoci cu e prome Ola di Calor cu nomber, cu ta atacando Sevilla na Spaña e siman aki, pushando temperaturanan riba di 43º Celsius (como 110º Fahrenheit), y logrando asina yega na e categoria mas severo den e sistema nobo di clasificacion di calor na e ciudad aki.
Ola di Calor ‘Zoe’ a trece temperaturanan sofocante na parti zuid di e pais den e ultimo dianan aki, specialmente den e region di Andalucia, unda Sevilla ta situa. Hasta anochi, e servicio meteorologico Spaño a registra temperatura cu tabata cayente banda di 29º Celsius, poniendo asina extra stress riba e curpa humano, cu ta depende di anochinan mas fresco pa recupera di e calor halto di den dia.
Zoe a bira e prome Ola di Calor cu nomber cu a yega Sevilla desde cu luna pasa nan a lanza oficialmente un programa piloto pa duna nomber y clasifica e Olanan di Calor, na un forma similar cu ta haci e ranking pa Horcan.
Pero solamente e Olanan di Calor mas grave ta ricibi nomber, y cu a wordo designa e aña aki den orden alfabetico den reverse. Despues di Zoe, lo bin Yago, Xenia, Wenceslao, y Vega.
Porfin e peor di e calor aki a cuminza bira menos. Pero e tabata un riesgo importante pa salud humano, segun proMETEO Sevilla, cu ta e sistema nobo di ranking di Olanan di Calor di Sevilla.
E programa di nomber ta un colaboracion entre ciudad di Sevilla y Atlantic Council’s Adrienne Arsht-Rockefeller Foundation Resilience Center, cu otro partnernan cu ta inclui Oficina Spaño pa Cambio Climatico, y varios Universidad y instituto di investigacion na Spaña. Nan a categoriza e Olanan di Calor na Sevilla den tres tipo. Categoria 1 ta esun di mas abao. Categoria 3 ta esun mas severo.
Ta asina hopi calor na Spaña, cu ni turistanan ta subi caya! Plazanan ta bashi cu djis un pipita di hende canando rond.
E sistema tin diferente criteria pa cada categoria, cu ta envolvi no djis temperaturanan di den dia, pero tambe e temperatura di mas abao pa anochi, humedad, y e efectonan cu e calor lo bay tin riba salud humano. Cada categoria ta activa un set di servicio di emergencia, manera emiti alerta di tempo, pone Gobierno habri lugarnan pa hende bay haya alivio, y pone algun persona di salud subi caya pa bay check poblacionnan vulnerable.
E aña aki Spaña a haye confronta cu temperaturanan extremo pa gran parti di verano. Calor fuerte a kibra recordnan local caba luna pasa, y e prome dos siman di Juni tabata esnan mas calor den e pais, segun Servicio Meteorologico Spaño.
Cambio climatico ta pone cu Olanan di Calor ta birando mas frecuente, mas intenso, y ta dura mas hopi rond mundo, aumentando e riesgonan pa salud humano. Pesey e sistema nobo di ranking na Sevilla pa Olanan di Calor, tey pa haci publico mas conciente di e peligronan di calor extremo.
