Renovacion di baño tabata un soño di varios aña

ORANJESTAD(AAN): Divi Impact Foundation a keda cla cu e proyecto di renovacion di Pius X School na Dakota y e scol a keda hopi bunita.

Durante un conferencia di prensa Diamars director di e scol Sheila Lazo-Tromp a trece dilanti cu el a keda hopi contento y orguyoso di por a forma parti di e proyecto aki.

“Riba nos mesun forza nos tabata purba traha riba e baño, pero Yanel Olivero di Divi Impact Foundation a bisa cu e ta bay tuma e parti aki tambe den e proyecto y el a traha riba un diseño masha bunita, pa haci esakinan casi perfecto”.

Ta algo cu e muchanan sigur ta bay haya hopi bunita y nos mes ta haya nan ‘wauw’, segun Tromp.

El a bisa cu Pius X ta hopi agradecido na e fundacion cu a logra caba e proyecto di baña den apenas 3 siman.

“Increibel tin biaha pa wak Yanel bezig cu e proyecto tin biaha 9’or di anochi Diasabra of Diadomingo, pa por a logra caba esaki den e corto tempo cu e tabata tin”.

Awe nos tin bañonan super bunita y moderno pa nos muchanan y awor nos tin cu educa e muchanan pa sigui mantene esakinan, segun e director.

“Drecha e bañonan tabata un soño cu nos tabata tin masha hopi tempo mes, pasobra no solamente e infrastructura y e klasnan mester ta agradabel pa e muchanan, sino tambe nan mester por sinti nan mes trankil y confortable den e bañonan di scol, segun Tromp.

El a  bisa cu recientemente a celebra 61 aña di existencia di e scol y cu e ta contento di por bisa cu despues di 61 aña nan tin un joya di un scol.

Pius X School como gradicimento den nomber di e maestronan, e trahadornan di limpieza, e muchanan y nan mayornan, a duna un regalo na e representantenan di Divi Impact Foundation.