ORANJESTAD (AAN): Gabinete Wever-Croes II ta mas cerca di worde forma. Den cuadro di esaki, reunionnan cu Stakeholders ta continua cu formador Evelyn Wever-Croes di Partido MEP, Ursell Arends di Partido Raiz hunto cu nan ekiponan.
Den varios ocacion, Prome Minister a expresa cu e reunionnan aki ta necesario pa asina Gobierno conoce for di e stakeholders kico nan lo desea pa Gobierno tene cuenta cu ne den e acuerdo di gobernacion.
Diaranson 18 di augustus a reuni cu organizacionnan riba e tema Social, Agricultura y Economia. Despues di e reunionnan cada representante a haya oportunidad pa duna declaracion na prensa pa asina nan tambe por informa nos comunidad. E siguiente personanan a duna declaracion na prensa: Terry Gumbs pa Mayornan di Muchanan Special. Gregory Fun A Fat di United Farmers Aruba. Marion Agumbero di PFTSA/Meta fund/FPEF/SPHA AIB Bank. Patrick Werleman di Stichting Sportsubsidie Aruba (SSA).
“Cu esaki e formacion di Gabinete Wever-Croes ta cumpliendo cu e palabracion cu nos tin y crea un base mas amplio den e acuerdo di gobernacion. Mi ta gradici tur stakeholder cu a participa y tambe mi ta duna un gradicimento special na tur prensa cu tur dia a keda pendiente di e reunionnan y entrevista e stakeholders y trece e informacion pa nos comunidad”, Prome Minister a expresa.
{gallery}social, agricultura y economia Formado{/gallery}
