Renobacion di 110 miyon Dollar a laga Hotel RIU Palace Aruba briya aun miho cu antes

El a caba di keda cla Diabierna siman pasa...

ORANJESTAD (AAN): Diamars mainta, DIARIO tabata presente na Hotel RIU Palace Aruba hunto cu varios dignatario, Parlamentario, mundo comercial y di turismo pa asina haya un recorido y splicacion di e fenomenal renobacion cu e parti interior cu e resort All-Inclusive aki a caba di keda cla cu ne.

   Un renobacion cu a bay segun fase, cu a start na April 2025, y cu na April 2026 a sigui den mas fase cu awor cualkier bishitante cu tin kizas 3 aña sin bishita RIU Palace Aruba, lo no bay reconoce partinan paden, cambernan, y tampoco amenidadnan nobo cu tin awo.

   Vice-President Juan Blanco tabata presente pa a duna bon bini na Ministro di Turismo Wendrick Cicilia, Ministro di Husticia Arthur Dowers, CEO di ATA kende ta Ronella Croes, CEO di AHATA kende ta Tisa LaSorte, Marc Figaroa di Aruba Ports, Parlamentario Jennifer Arends-Reyes di Comision di Turismo, Parlamentario Gino Goeloe (Futuro), y Parlamentario Eduard Pieters (PPA).

   E suma di 110 miyon Dollar a transforma henter e Lobby bunita di RIU Palace Aruba, den awor algo mucho mas precioso, combina perfectamente cu iluminacion indirecto di color perfecto, varios trim cu ta duna contraste enorme na e muraya y pilarnan.  E bunita sofa rondo den centro a haya un touch-up, y ainda tey.  Perfecto pa saca potret riba dje.

   Derrick di RIU Palace Aruba a splica cu e renobacion na 2025 a cuminza prome cu e cambernan, y asina a sigui segun fase.  Despues a sigui cu e areanan comun y publico, y hasta e cushinanan y laundry patras a wordo remodela y haci mas moderno y eficiente.

   Nan a keda cla, y Diabierna dia 31 di Juli 2026 nan a duna bon bini bek na nan prome huespednan cu a yega pa goza nan vakantie den un resort completamente remodela.

   Hotel RIU Palace Aruba ta un di e hotelnan mas elegante den e cartera Caribense di RIU y e renobacion aki ta agrega un toke di diseño y sofisticacion. E lobby ta mantene e elegancia clasico di e liña di RIU Palace, enfatisando briyo y introduciendo materialnan y elementonan di moda cu ta yama e huespednan bonbini na un ambiente moderno y contemporaneo.

   Tur camber ta completamente renoba, cu enfoke riba tononan cla y color y materialnan natural.

   RIU Palace Aruba tin siete lugar pa nan bishitantenan come, y esey ta consisti di 4 restaurant a-la-carte, 1 restaurant principal di buffet, y tambe 2 restaurant di comfort food, incluyendo un Sports Bar nobo cu bista espectacular pa beach.

  Un otro atraccion grandi pa e invitadonan adulto ta e acceso na e RIU Party, cu ta tuma luga tur

diabierna na e hotel RIU Palace Antillas. Sinembargo, RIU Palace Aruba ta familiar y ta ofrece un programa di entretenimento amplio cu actividad pa tur edad, mas notablemente e club di mucha RIU Land. Ademas, e hardinnan y pool na canto di lama a keda completamente transforma.

   Den otro relatonan por lesa mas di e restaurantnan, y tambe di e sistema di Elite Members di RIU cu awor ta haya cambernan super special, hasta un pida cerca di beach special reserva pa nan cu nan propio bar, y tambe nan tin nan propio cocktail bar den lobby, y nan propio restaurant.

    Cu e reapertura aki, RIU Hotels & Resorts ta reenforsa su propuesta di balor halto den e segmento di vakantie den Caribe. E renobacion completo di RIU Palace Aruba ta permiti e compania pa modernisa e experiencia di e huespednan na e hotel iconico aki, reafirmando su compromiso cu e calidad mas halto di servicio den un di e destinacionnan mas busca di e region.

   DIARIO ta felicita gerencia di Hotel RIU Palace Aruba cu e renobacion cu for di punto di bista artistico, a bira sensacional awor!