Segun CEO di ATA señora Ronella Croes:
ORANJESTAD (AAN): “Pa Aruba Tourism Authority (ATA) no solamente ta importante pa posiciona Aruba internacionalmente, pero hopi importante tambe ta pa duna atencion na nos isla pa nos mes y pa e bienestar di turismo”, asina e CEO di ATA, señora Ronella Croes a comenta na DIARIO den un entrevista recien.
Señora Croes a conta di e trayecto di ATA indicando cu na aña 2011 a comberti ATA den un instituto independiente den esfera publico. Parti di e cambionan cu a bin cu esaki tabata pa institui un fondo separa cu a haya e nomber Tourism Product Enhancement Fund (TPEF) cual no ta resorta bou di ATA sino bou di Gobierno di Aruba cu ta maneha e presupuesto di e fondo aki.
Croes a splica cu parti di e touristen heffing, antes yama room tax, ta bay den caha di Gobierno pa e fondo aki y un parti ta keda pa Gobierno pa otro propositonan y ATA ta haya 57% di e entrada aki. E porcentahe aki di e touristen heffing, ATA ta uza pa su tarea primordial pa mercadeo y pa posiciona Aruba internacionalmente den mas o menos 15 mercado den diferente region. Tambe mas y mas den e ultimo añanan, parti di e placa ta bay den nos isla, den cuido di tur loke Aruba ta ofrece nos bishitantenan y tambe den loke ta importante pa nos comunidad.
El a splica cu e manera cu ta organiza ta pa medio di e Infra committee cu ta consisti di ATA, DOW, Ministerio di Turismo, y DIP. Tin colaboracionnan tambe cu Aruba Conservation Foundation, DNM, y tpef tambe na momento cu tin mester. Segun el a splica, e institutonan aki ta traha riba diferente proyecto infrastructural pero tambe proyectonan di otro indole cu ta den beneficio di nos turismo pero tambe di nos comunidad.
Banda di esaki, el a agrega, cu ATA tin su propio agenda di prioridadnan. Entre otro, den e ultimo añanan ATA a cera acuerdonan strategico cu diferente instituto manera Cas di Cultura, invertiendo den preservacion di nos cultura; Aruba Conservation Foundation, un acuerdo di tres aña, a inverti no solamente den e parke sino pa proteccion di naturalesa; CEDE Aruba, ta yuda cu diferente actividad den bario den beneficio di comunidad di Aruba pero tambe actividadnan atractivo pa bishitantenan yega mas cerca di comunidad: Acuerdo cu EPI, Universidad di Aruba, Stimami Sterilisami. “Asina por sigui menciona hopi otro ehempel di tur loke ATA ta contribui na dje bou nos maneho di destino”, señora Croes a menciona.
Considerando e evolucion y etapa di desaroyo turistico cu Aruba ta den, ta un indicacion cu nos isla mester di hopi atencion, pa nos mes, pero sigur tambe pa e bienestar y e salud di nos turismo. Esaki ta bin cu diferente proyecto di ATA banda di TPEF.
“Esaki ta algo cu nos a cuminsa cu ne for di 2014 caba conforme nos plannan di maneho multianual y nos plannan annual unda por mira tur proyecto unda ATA ta pone nos granito y pakico nos ta haci esaki. Mi ta kere cu ta na su luga pa clarifica algun cos den e ley mes di ATA pa tin miho bista di kico ta e puntonan di prioridad cu bou di un instituto di turismo tin cu sigui carga y haya atencion pa sigura cu e fondonan cu ta genera pa medio di turismo, sigui wordo canalisa directamente den e aspecto di nos producto cu ta beneficia nos posicionamento y nos strategia turistico como Aruba”, señora Ronella Croes a termina bisando.
