Renobacion a keda cla y awor Pasadia Briyo di Solo tin su ‘sala di snoezel’

ORANJESTAD (AAN): Nan ta contento!  E team y clientenan di Pasadia Briyo di Solo kier a gradici tur  persona

cu di un of otro manera a duna nan aporte pa asina nos por a realisa otro proyecto cu ta e renobacion di nan asina yama “SnoezelRuimte”.

   Nan kier gradici Jorge Rosel  di Notorious design pa e tremendo arte di airbrush.

   Pasadia Briyo di Solo tin capacidad pa 60 cliente adulto cu deficiencia intelectual cu ta bishita e Pasadia tur dia. Na Pasadia Briyo di Solo tin 5 grupo di 12 cliente, unda ta worde ofreci actividadnan pa nan desarrollo intelectual, pa nos clientenan por bira mas independiente posible y /of mantene loke nan a siña caba.

   E asina yama Sala di Snoezel ta un parti di e programa cu Pasadia Briyo di Solo  ta brinda na nos cliente nan. E Snoezel Ruimte ta worde usa cu 2 meta. E Prome meta ta pa stimula e 4 sentido nan mas importante di nos clientenan pe; Oido, visual, holor, sinti. Di dos meta di e Snoezel ruimte ta pa relaha y/of baha e estimulo nan di e 4 sentidonan aki.

   E sentido di Oido nos ta stimula cu e sistema nobo di Smart device Alexa cu ta produci sonidonan di bestia, ola di lama, awa ta yobe. E systema aki ta produci Delta Wave cu ta yuda e clientenan relaha den Snoezel Ruimte.

   E sentido di visual, e sistema di lus ta manda efecto di lus cu diferente forma y color, Snoezel Ruimte su muraya a ser decora cu airbrush di diferente pintura di bao di lama y esaki nan ta refleha cu e sistema di lus. Mientras  cu e cliente ta disfruta y relaha su mes ariba e efectonan di lus.

   E sentido di holor, cliente nan ta ricibi aroma therapie cu nos difuser machine cu diferene holor di aroma.

   E sentido di sinti (voelen), tin un baki yena cu bala caminda clientenan ta drenta den e baki aki. Clientenan ta drumi y sinti e bala nan rond di nan curpa, tambe nos tin cama di awa y cama di aire cu cliente nan por drumi ariba y relaha nan mes.

   Nan kier gradici un biaha mas tur esnan cu a haci donacion na nos Pasadia na aña 2017 na momento cu e 3 gruponan a kima. Apesar di a drecha 3 grupo nan aki full back. Nos a logra diferente otro proyecto nan di renobacion aki na Pasadia y e ‘Snoezel Ruimte’ ta un di nan.