ORANJESTAD (AAN): Un situacion di spanto ta loke a presenta su mes siman pasa na cas di famia Henriquez na Cashero 1.
E señora a relata na DIARIO, cu tabata den oranan di atardi, cu diripiente su sobrino ta canando den sala na nan cas y el a nota cu tin algo ta ‘moviendo’ den e wandmeubel.
El a bira su wowo pa check ta kico, y aki el a bin haya e sorpresa di su bida! Tin un reptil full lora den un skina di e wandmeubel, mey-mey di tur e obhetonan poni eyriba.
Ora di a mira bon, a nota cu ta trata aki di un Boa.
E sobrino aki mesora a core bay yama su Tata cu a yega eynan cu un hemchi. Su Tata ta un homber balente y na un forma tactico el a gara e cabez y demas curpa di e Boa, y a sake for di e Wandmeubel y pone den un hemchi cu e sobrino a trece.
E señora a splica cu mesora nan a saca e reptil for di sala y a bay cune pafo. El a bisa cu nan a yama Parke Nacional tambe pa raporta esaki.
Pero nan a bay panort di cas cune, unda cu nan a rek e pa asina midi su largura. E tabata di como 1.25 meter. Despues e señora di cas mes di 73 aña di edad a pasa man pa un shovel, y a mata e Boa.
Con el a bay den cas? Nan ta indica cu semper ora e porta ta habri, nan ta eynan. Pero e ta sospecha cu e Boa lo a subi via e stul den veranda, bay halto y drenta e cas via shutter.
Tambe el a nota ultimo dianan cu e pushi grandi na cas ta actua straño y ta blo mira pafo.
El a splica cu nunca antes a yega di haya Boa den nan cura di cas. Pues e ta full un sorpresa pa nan.
