Prijs di keda haci nada ta hopi mas grandi cu inverti den compensacion husto pa empleadonan

PoliticologoTim ’S Jongers

ORANJESTAD (AAN): Tim ’S Jongers, autor di e buki Armoede uitgelegd aan mensen met geld, a enfatisa cu hende cu ta traha mester por biba di nan salario. Segun e experto, combati pobresa no ta solamente un responsabilidad di Gobierno, sino tambe di e empresarionan y sociedad den su totalidad.Tim ’S Jongers ta un politicologo, especialista den administracion publico y autor, naci na Belgica na 1981.

E ta traha como periodista pa e plataforma Hulandes De Correspondent, caminda e ta dedica su trabou na temanan manera pobresa, desigualdad social y inseguridad financiero. Entre 2022 pa 2025e la fungi como director di Wiardi Beckman Stichting cu ta hala cientifico di partido PvdA, actualmente e partido yama PRO.

E mes a crece den pobresa y a combina su experiencia personal cu investigacion cientifico pa splica e realidad di hende cu ta biba den e condicionnan dificil. Na 2024 el a publica su buki Armoede uitgelegd aan mensen met geld, cu ta dirigi principalmente na e personanan cu tin influencia riba decisionpolitico y economico.

Un bon salario ta esencial den combate di pobresa

’S Jongers a splica cu tin un diferencia importante entre simplemente traha duro y gana un salario cu ta permiti hende cubri nan necesidad basico.Segun dje, no ta logico cu un persona ta traha, pero ainda no por paga su gastonan diario. Un bon salario no solamente ta beneficia e empleado, sino tambe ta contribui na un sociedad mas stabil.

Aumento di salario minimo no necesariamente ta causa subida di prijs

Na Aruba tin preocupacion cu aumento di salario minimo por provoca subida di prijs, ’S Jongers a splica cu Hulanda a conoce un discusion similar algun aña pasa.Segun dje, e experencia na Hulanda no a mustra evidencia convincente cu aumento di salario minimo necesariamente ta causa e subida di prijs. El a indica cu hende cu ta gana poco placa generalmente ta uza casi tur nan entrada pa cumpra alimento y cubri necesidaddiario. Ora nan gana mas, e placa adicional ta circula bek den economia. Segun ’S Jongers, aumento di prijs di energia, manera gasolin y petroleo, ta un factor importante den e costo di bida, especialmente pa e paisnan cu ta depende di importacion.

Empresarionan tin un responsabilidad den sociedad

E discusion cu ta tumando luga na Aruba tocante e posibilidad pa aumenta salario minimo y acopla esaki na e bestaansminimum.’S Jongers a reconoce cu un aumento salarial por representa un reto pa e empresarionan, pero el a enfatisa cu nan tambe ta forma parti di e sociedad.

"Mi ta compronde cu esaki por ta hopi complica pa e empresarionan, pero comercio no ta traha den isolacion. Bo ta traha den un sociedad y bo tin beneficio di un sociedad cu ta crea trankilidad, cu ta saludabel y cu ta forma bon empleadonan", el a declara. Segun e cientifico den politica, empresarionan tambe ta beneficia ora nan empleadonan ta saludabel, ta sinti nan mes bon y por concentra riba nan trabou sin preocupacion financiero constante. El a splica cu sociedad, di un manera of otro, ta paga e prijs di pobresa, sea pa medio di gastonan di salud, ausencia na trabou of otro consecuencianan social. Pa e motibo aki, el a propone cu ta importante considera inversion den bienestar di hende en bes di solamente carga cu e consecuencianan di pobresa.

Hende cu ta biba den pobresa mester wordo scucha

Un otro punto importante cu ’S Jongers a toca ta e manera cu sociedad ta wak hende cu ta biba den pobresa.El a rechasa e idea cu pobresa simplemente ta resultado di un persona cu no sa maneha su placa. Segun dje, stress financiero constante por influencia e decisionnan cu hende ta tuma den nan bida diario. Tambe el a enfatisa cu hopi biaha ta net e decisionnan tocante combati pobresa ta wordo tuma sin scucha e personanan cu ta directamente afecta.

’S Jongers a haci un yamado pa e personanan cu ainda no ta convenci di e importancia di combati pobresa, pa nan bay den dialogo directamente cu hende cu ta biba den e situacion aki."Si bo no ta convenci, bay papia un biaha cu hende cu ta biba den pobresa. Pasobra ken sa miho kico ta e solucion cu e personanan cu tin e problema?"

Cu e mensahe aki, e autor a enfatisa cu pa logra un maneho efectivo contra pobresa, ta esencial pa compronde e realidad di e personanan cu diariamente ta enfrenta dificultad financiero.