Gobierno Rutte tabata agonisa ora a daña imagen Gobierno di Aruba
*DIARIO a bolbe entrega prueba di autenticidad di su informacionnan
ORANJESTAD(AAN)—“Berdad nunca a perhudica ningun Pueblo, causa of nacion.”Esaki ta e lema cu cual DIARIO a nace y ta sigui presenta su informacion na Aruba te awe.
Prueba di veracidad di informacionnan di DIARIO a wordo duna na e momento cu Gobierno di Mark Rutte na Hulanda ya tabata den su caida cu no por a wordo preveni mas y na e momentonan cu problemanan a culmina a crea tension politico pa Aruba den Reino.
Ya pa basta dia, DIARIO ta splica Pueblo di Aruba cu Gobierno Mark Rutte 4, tabata tambalea y por a cay cualkier momento.
Na momento cu DIARIO a presenta e pakete pisa di medidanan cu e gabinete Hulandes a introduci entrante Prome di Juli, DIARIO a mustra riba e tensionnan cu ya tabata parti di Gobierno Rutte, cu for di su nacemento a nace cu su declaracion di caida.
Aruba tabata en espera di e bishita di Secretario di Estado, Alexandra van Huffelen pa discuti e pago di e prestamo cu el a ricibi for di Hulanda, ora na Hulanda discusion a start riba introduccion di un Ley di Supervision financiero di Reino pa Aruba, un RAFT, na lugar di LAFT, cu ta e ley Arubano.
Cu Aruba y Reino lo no ta di acuerdo cu otro tabata mas cu obvio ya cu Gobierno di Aruba semper a opone e supervision pa medio di un RAFT, un medida di Reino cu por a tuma na 2010 ora Gobierno di e tempo, Gobierno Mike Eman, a hinca Aruba den un desastre financiero y Aruba a cay bou e supervision pa medio di LAFT.
For di 2017, ora Gobierno Evelyn Wever-Croes a haya mando di gobernacion di Aruba, el a traha riba e recuperacion financiero di Aruba y a introduci medidanan financiero impopular pa asina garantisa cu Aruba na 2023 tin un saldo financiero positivo cu ta sumamente importante den e situacion mundial actual.
E maneho di Gobierno Wever-Croes mester a topa cu respaldo di Gobierno Hulandes, cu durante e bishita di Secretario di Estado Alexandra van Huffelen, a topa cu e insistencia Hulandes pa un Ley di Reino.
DIARIO a splica e situacion cu e gobierno di cual van Huffelen ta forma parti y cu durante bishita di Van Huffelen tabata agonisando y finalmente a yega na su fin e siman aki den un situacion politico sumamente serio na Hulanda, cu lo bay urna electoral riba termino cortico cu posibilidad di cambionan grandi den e constelacion actual di partidonan.
Informantenan di DIARIO a mustra riba e situacion sumamente serio cu a surgi den Reino pero cu tabata conoci for di momento cu a forma e Gobierno Rutte, manera den otro articulo DIARIO lo trece dilanti.
Importante a bira awor e negociacionnan entre Aruba y Hulanda, cu manera DIARIO a adverti for di algun siman pasa lo mester duna prueba cu e politiconan Hulandes ta asumi un posicion fuerte enfrente Hulanda.
Esaki ta e esencia di e caida di Gobierno Hulandes tambe cu ta basa riba e forma cu ta atende cu migrantenan cu ta otro di e puntonan discutibel den e comunidad Hulandes, cu tambe ta enfrenta problema serio despues di e serie di problemanan cu a afecta henter mundo.
Hulanda como parti di NATO por ehempel, ta directamente envolvi den e Guera di Ukraine pais cu cual Hulanda tin lazonan directo.
Cambio di clima sigur ta afecta e pais cu a kita un parti importante di su teritorio for di laman y e menasa di laman.
Informantenan ta indica cu awor cu Hulanda a drenta e zona di eleccion nobo, Aruba mester ta sumamente atento cu e forma cu e exigencia pa Raft, un Ley di Reino di Hulanda, ta wordo atende na e pais den e acercamento total pa demostra e Pueblo di Hulanda, cu nan tin un gobierno cu ta traha na interes di e votador Hulandes.
DIARIO ta sigui tur desaroyo y ta den contacto directo cu su informantenan pa mantene Aruba informa.
