Eleccionnan nobo na Hulanda sigur preocupacion pa Aruba
*Partido BBB lo hiba Hulanda na e realidad politico di e pais
*Futuro politico Alexandra van Huffelen un pregunta grandi
ORANJESTAD(AAN)—Un momento crucial pa cual DIARIO a adverti a bati na porta na Hulanda cu for di eleccionnan pa Provinciale Staten na Maart, no tabata conoce un situacion gubernamental mara na e realidad politico di e pais.
E Gobierno di Mark Rutte a sufri un derota cu a haci mayoria hende puntra nan mes, si Mark Rutte mester a keda Prome Ministro di Hulanda of si eleccionnan nobo mester a wordo convoca pa hiba Hulanda na su realidad politico nobo, den cual e partido BoerBurgerBeweging, BBB sigur ta central.
Sucesonan di dia Prome di Juni a haci necesario pa DIARIO mustra atrobe cu e situacion den Gobierno Hulandes por presenta problema serio cualkier momento, pa motibo cu e partido mas grandi di Hulanda mes, tabata Oposicion den Tweede Kamer.
Ayera na momento cu a bira conoci cu porfin loke tabata spera a bira realidad, e pensamento grandi a keda cu e partido di Mark Rutte, e politico cu a kibra record como Prome Ministro di Hulanda, mes a manda Gobierno cas.
Mark Rutte ayera a opone e pensamento aki, pero si sigui e base di democracia, ta mas cu normal, cu ta bini cambio den un Gobierno cu no ta representa e pensamento di e Pueblo Hulandes mas, aunke segun e sistemanan electoral di e pais, Mark Rutte cu e sosten di mayoria di Tweede Kamer, mester ta Prome Ministro.
Con dificil politica por ta, sigur a bira bisto pa Aruba tambe pero cu e pregunta kico ta bay pasa.
E partido grandi di Hulanda actualmente ta BoerBurgerBeweging, cu a gana eleccion na un forma aplastante manera a keda confirma dia Prome di Juni 2023, manera DIARIO a notifica su lectornan.
E resultado electoral pa Provinciale Staten, cu a duna e partido BBB un total di 16 asiento den Eerste Kamer, no a laga lugar na duda kico Hulanda kier.
Si e partido BBB a haya 16 asiento, e partido di Mark Rutte a bay atras pa keda cu 10 asiento.
Ora papia di eleccion Hulandes, mester mira kico lo pasa cu e figuranan principal pa Aruba of mihor bisa den bista di Aruba.
Kico lo pasa cu Alexandra van Huffelen, cu ta e actual Secretario di Estado pa Relacionnan den Reino?
Un bon pregunta cu ta exigi pa bay tira un bista den e partido di Alexandra van Huffelen, uno di e partidonan mas chikito cu a percura pa Gobierno Mark Rutte Cuatro cu awor ta stop di existi, por a mira luz.
D’66 ta basta atractivo cerca cierto gruponan considera minoria of cu un posicion special den politica. Durante eleccion el a bay atras den voto cu el a ricibi y tin cinco asiento den Eerste Kamer.
Kico lo pasa cu D’66 den un eleccion nobo? E pregunta cu tur partido den gobierno Hulandes actualmente ta haci su mes pasobra manera DIARIO a informa for di eleccionnan na Hulanda, nan a bay atras den voto.
Hulanda a vota pa loke ta awor den oposicion cu e partido BBB pues central. Un partido cu kier lucha pa agricultornan pero tambe basicamente, e ciudadano Hulandes cu ta sinti cu como agricultor, empresario, trahador, e no a haya e atencion cu e merece di Mark Rutte.
Loke a pasa awor na Hulanda tabata resultado di loke a pasa pa eleccion pa Eerste Kamer pero hasta prome cu esey.
Gobierno Mark Rutte a wordo forma cu hopi dificultad. Tabata sumamente dificil pa forma un Gobierno a base di e ultimo resultado pa Tweede Kamer, pero awor e Gobierno a cay.
Ora mira bon e pregunta grandi ta con e partidonan cu a forma Gobierno Mark Rutte por a traha cu otro a base di e puntonan central di filosofia di nan partido.
Kico lo pasa cu Aruba ta e pregunta. Pa ta sincero, manera na diferente ocasion DIARIO a trece dilanti, Aruba mester a haci su mes e pregunta aki, si Gobierno Mark Rutte mes a keda na mando.
Den un mundo sumamente dificil y cu cambionan grandi, un grupo creciente kier solucion. Un grupo creciente kier pa tene na loke tabata su motibo pa bay vota.
Mark Rutte obviamente no por duna contesta positivo na loke e votador Hulandes realmente kier.
Cambionan cu a tuma lugar dia Prome di Juni na Hulanda y cantidad di cambio na caminda ta papia un palabra cla.
VVD por bisa loke e kier. Importante ta keda cu cifranan di eleccion ta papia e ultimo palabra, cu a mustra cu VVD y Rutte a perde voto, cu ta keda e factor esencial pa bida di un partido politico.
Cambio ta na caminda pa Hulanda manera semper DIARIO a pronostica y lo sigui informa su lectornan!
