Recuperacion Arubano ta forsa di Aruba cu eleccion nobo na Hulanda
*Eleccion na pais Hulanda den suspenso Union Europeo y NATO
*Autodeterminacion financiero ta crucial den gobernacion di Aruba
ORANJESTAD (AAN): E forma cu autodeterminacion gubernamental di Aruba a wordo ehecuta for di 2020 a bira e forsa financiero cu Status Aparte pa medio di un saldo positivo di presupuesto di Aruba, ta exigi awe den un crisis mundial y cu un Gobierno di Reino, na caminda pa eleccion.
Pa Aruba por sigui nabega mientras pais Hulanda ta prepara pa acudi na urna electoral na October cu e speranza cu 2026 lo habri cu un Gobierno nobo pa Hulanda y asina un Gobierno nobo pa Reino Hulandes, e determinacion gubernamental di Aruba hancra den presupuesto di 2020, ta bira punto central.
Dia Prome di Januari 1986, e derecho di autodeterminacion (pues Aruba ta dicidi pa su mes) a bira central den tur loke pasa na Aruba, cu a bira un pais cu su propio Parlamento y Gobierno, cu su propio responsabilidad directo pa su bienestar.
Dia Prome di Januari 1986, Statuut a resona na Aruba pa splica cu e bandera Hulandes lo bula na Aruba cu e condicion di “Steunend op Eigen Kracht doch met de wil elkander bij te staan” (Sosteniendo riba forza propio pero cu e boluntad pa yuda otro).
Status Aparte pues como base di felicidad di Pueblo, a exigi un bon maneho financiero sigur ora problemanan bati na porta di Hulanda.
For di prome cu pandemia Covid-19, DIARIO a splica Aruba cu 2020 lo marca historia debi na e hecho cu Reino Hulandes lo bay tene duro na e realidad di Statuut, cu ta exigi pa Aruba como pais autonomo, carga su propio responsabilidad.
Na 2014 Aruba a perde su fortaleza autonomo y a bira un mucha bou supervision cu ta cana na man di su mayor ora e kier gasta su placa!
Na 2018 e situacion financiero di Aruba a cambia di rumbo cu medidanan pa atende cu e problema. Na 2020 e prome presupuesto cu un saldo positivo a wordo logra, pero a wordo desbarata pa Covid-19.
E Arubiano a entrega prueba cu e ta digno di Status Aparte mientras el a participa na e recuperacion financiero di Aruba, den e situacion mundial despues di Covid-19.
E recuperacion financiero di Aruba a bira e base mas importante pa Aruba, manera semper DIARIO a splica y cu awe desaroyonan den Reino y na mundo, ta confirma.
DIARIO semper a splica Aruba, cu pa Hulanda no ta solamente e lazonan di Reino ta conta, pero cu Hulanda ta parti di Union Europeo y cu Hulanda tambe tin su autonomia financiero.
E autonomia financiero di Hulanda den Reino Hulandes, mester garantisa cu como pais den Reino, Hulanda, ta sirbi interes di e ciudadano Hulandes biba na Hulanda y cu realmente ta ciudadanonan di Union Europeo.
Hulanda como pais ta miembro di organisacionnan di cual Aruba no ta forma parti manera NATO y ta parti tambe di Union Europeo.
Asistencia internacional y den Europa cu placa Hulandes, ta uno di e problemanan cu Hulanda mester a soluciona di su fondonan, los di e asistencia financiero cu e ta duna Aruba como parti di Reino.
DIARIO durante ultimo aña a prepara Aruba pa e berdad politico nobo di Hulanda cu mester lucha pa e interes di e Pueblo Hulandes den e situacion mundial nobo.
DIARIO a mustra cu gastonan di e cooperacion militar transatlantico NATO, cu cual Hulanda ta parti, mescos cu gastonan pa Union Europeo, ta sigui aumenta.
E pakete di responsabilidad di pais Hulanda y exigencia mundial entre otro pa asilo politico, ta resalta y a bira un bom den e Gabinete Hulandes, cu manera DIARIO a anticipa for di su nacimento, awor a cay.
DIARIO a mantene Aruba informa mientras señalnan fuerte tabata indica caida di Gobierno di Hulanda, cu na mes momento a bira caida di Gobierno di Reino .
Na e momentonan aki e stabilidad financiero di Aruba, cu ta e base di placa cu e pais mester tin pa sostene bienestar di su pueblo riba tur tereno, ta e punto mas importante cu cual Aruba por enfrenta futuro den cual no por depende mas, manera Hulanda mes a confirma, cu asistencia continuo di Hulanda.
Si e creacion di un saldo positivo, cu Aruba a crea riba tereno financiero no tabata existi, Aruba tin motibo pa ansiedad debi na e situacion den Reino y na nivel internacional cu lo tin impacto pa Aruba
Aruba for di 2024, a conta cu cifranan presenta pa DIARIO cu ta papia di stabilidad financiero actual cu a wordo crea y cu mester wordo mantene!
Cu un saldo positivo di entrada y gasto di e pais for di 2024, Aruba awe por confronta e realidad mundial actual sumamente alarmante y e crisis provoca pa caida di Gobierno di Reino, eleccionnan nobo na October na Hulanda y incertidumbre di e fecha, cu Hulanda y Gobierno di Reino, lo conoce un Gobierno nobo.
Formacion di un gobierno nobo na Hulanda por tuma basta tempo y esaki ta causa e pregunta nobo, si 2026 lo habri cu un Gobierno nobo pa Reino Hulandes y pa Hulanda y kico lo ta e resultadonan pa Aruba!
Den e situacion aki, e bon maneho di placa di Pueblo cu Aruba a conoce for di 2018 ora e pakete directo di medida a wordo introduci, mester continua pa Aruba duna prueba cu e por maneha su derecho di auto determinacion na fabor di Pueblo di e pais.
