Presidente di Parlamento Marlon Sneek:
*Mericanonan mes ta comodo cu ne y ta gust’e
ORANJESTAD (AAN)—Presidente di Parlamento, señor Marlon Sneek, den un entrevista cu Matutino DIARIO, a elabora tocante e sistema di
“US Preclearance” di Merca cu ta wordo aplica na Aruba, y cu a wordo re-negocia durante un biahe na Washington cu e Parlamentario a realiza.
Parlamentario Marlon Sneek a indica cu mester a re-negocia e Preclearance y esaki ta bayendo den bon caminda.
“Loke ta keda falta ta algun detaye cu mi ta kere cu den luna di juni nos mester tin e producto final, pasobra manera ta conoci, nos aeropuerto a expande tambe, anto a bay papia di biaha riba e detayenan ey, con nos por garantiza cu nos tin mas funcionario Mericano pa duna e servicio di preclearance, pa nos por baha e rijnan cu nos ta wak eyfo”, Sneek a declara.
Parlamentario Sneek a sigui splica cu pa amplia e grupo cu Merca tin na Aruba pa duna e servicio ey, pa nos por garantiza tambe cu e flow cana bon.
“Ta detayenan cu hopi biaha hendenan no ta para keto na dje, pero cu ta cosnan cu ta duna e pais aki e confianza cu nos tin, y bo ta haye ora cu bo combersa cu e representantenan aki, cu nan mes ta bisa cu nan a bin Aruba y e aspecto ey ta hopi great, pasobra ora mi baha for di avion, mi ta coy mi maleta cana bay mi cas, pasobra mi no tin cu para den ningun rij mas”, Parlamentario Sneek a señala.
El a sigui bisa cu na Merca, nos sa cu e aeropuerto ta hopi mas grandi, ta procesa hopi mas pasahero, dus cu e servicio aki p’e mesun Mericano ta comodo y nan ta gust’e.
