For di decada 80 no a mira e malesa aki mas na e isla
ORANJESTAD (AAN): Departamento di Salud Publico di Aruba a sigui monitor di cerca e desaroyo rond di transmision di e virus di Measles rond mundo y ta preparando un plan pa limita e posibilidad di cu lo por presenta casonan of un brote di e malesa na Aruba.
'Measles' of manera nos ta yam’e “Sarampi” ta un di e malesanan mas contagioso cu ta existi y ta wordo causa pa e virus di sarampi. E virus aki ta transmiti su mes hopi facil via aire na momento cu e persona infecta ta tosa of nister. E malesa por ocaciona complicacion severo y hasta morto. Prome cu introduccion di e vacuna contra Measles na mundo den aña 1963 tur aña un cantidad grandi di mucha particularmente bou di 5 aña tawata fayece aconsecuencia di e malesa aki. Desde introduccion di e vacuna contra Measles e casonan di Measles mundialmente a baha y na Aruba desde su introduccion na aña 1979 no a mira e malesa aki mas desde decada 80. Esaki ta danki na e grado di vacunacion halto (95%) bou di nos muchanan entre edad di 0 cu 10 aña.
Pero recientemente World Health Organisation (WHO) a bati alarma atrobe pa aumento den casonan di Measles tumando lugar den diferente pais di Europa y USA. Den Caribe no tin transmision local notifica, pero e riesgo ta real pa motibo di caso importa. Organisacionan di salud ta di opinion cu e brote di Measles tumando lugar ta debi na reduccion den grado di vacunacion particularmente despues di e Pandemia di COVID. Mas hopi persona disidi cu nan no ta vacuna nan yiu contra Measles, mas e inmunidad di e pais ta baha ocacionando cu e posibilidad ta bira mas grandi pa e virus transmiti su mes atravez di esnan cu no ta vacuna pero tambe esnan mas vulnerabel.
Manera a informa Departamento di Salud Pubico a bin ta monitor e desaroyo mundial aki di cerca y a cuminsa reuni tambe cu diferente partners pa cuminsa traha riba un plan pa mitiga of reduci e posibilidad cu Aruba lo por haya un brote di Measles y proteha esanan mas vulnerabel.
Mescos cu tawata imposibel pa a evita e virus di COVID di drenta nos pais, no por descarta cu e virus aki tambe na un momento lo drenta nos pais. P’esey ta importante pa internamente nos pais ta bon prepara pa maneha su transmision ora esaki drenta y alaves ofrece proteccion na e grupo di ciudadanonan mas na riesgo di bira hopi malo of hasta fayece si nan bin den contacto cu e virus.
Den e siguiente dianan DVG lo bay ta informando comunidad mas riba e malesa aki y e plan di prevencion pa limita transmision di e virus riba e isla.
Bo salud ta bo responsabilidad, tuma accion pa proteha bo mes contra Measles.
