Reina di Tumba a bira Jorienne ‘Gigi’ Angela

Un biaha mas a saca un reina...

ORANJESTAD (AAN): Diasabra anochi ta multitud di hende a aglomera den Balashi Beer Garden pa presencia Festival di Tumba, organiza pa SMAC.  E cantidad di hende cu a acudi na esaki ta asina hopi, cu tabata mustra cu e lugar a bira chikito pa e multitud.

   Un total di 14 participante riba escenario a competi, y di trempan mesora a trece ambiente total den e lugar.

   Na final di e anochi, poco prome cu 2:00 am, a bira conoci cu e ganadora maximo a bira Jorienne Angela, mihor conoci como ‘Queen Gigi’.  E dama aki ta un Rookie, y alavez a bira conoci algun siman pasa ora cu el a causa sensacion di su trabao como Maestro di Ceremonia pa Eleccion Reina Infantil y Hubenil di Carnaval.

   Jorienne a gana cu su cancion ‘Ban Cumi’, cu ta un composicion di Quincy Hasham, Janiro Eisden, y Rygel Isabella.  E areglista ta Rygel Isabella, y el a wordo acompaña pa banda D’Licious.

   Su voz cu bon tonada, articulacion perfecto, y su energia durante canto ta algo cu a sobresali inmediatamente ora cu Jorienne a presenta su cancion pa prome biaha.  Publico a sinti mesora cu ta un dama lo sali ganadora, y na final esey a resulta berdad.

   Prome Finalista di anochi a bira Chendell Beaumont cu e cancion “Caya Pidi”, cu ta su propio composicion, y aregla door di Dwight Leoneta.  Acompaña pa Buleria.

   Segundo Finalista di anochi a bira Zaïna Falconi cu e cancion ‘Yena cu Color’, componi pa Chendell Beaumont, y aregla pa Rygel Isabella.  El a wordo acompaña pa Buleria.

   Ganador di Premio Tumba Loco a bay pa Tyson Croes cu e cancion ‘Cuki Lerchi’, componi door di Rygel Isabella y Janiro Eisden, y aregla pa Rygel Isabella.

   Como ‘Rookie of the Year’ a premia Jorienne Angela.  Premio di Mihor Costume a bay pa Veloushka Krozendijk.  Artista mas Popular a bira Jorienne Angela.

   Premio di Mihor Composicion a bay pa e cancion di Jorienne Angela, cual a ser componi pa Quincy Hasham, Janiro Eisden y Rygel Isabella.

   Premio pa Mihor Areglo a bay pa e cancion di Zaïna Falconi, aregla pa Rygel Isabella.

   Pabien na tur ganador, y felicitacion na e organizador.  Nan a sa di yena Balashi Beer Garden yen-yen y tabata un gran exito.