Parlamentario Marco Berlis, fraccion di MEP:
ORANJESTAD (AAN) – Parlamentario Marco Berlis, di Fraccion di MEP, a trece dilanti den conferencia di prensa, como di dos tema, cu e Comision di Labor ta enfoca riba regulacion di desempleo y tambe tocante seguridad social.
“Den mi mision como Presidente di e Comision Fiho di Labor, di Parlamento di Aruba, ultimamente a haya un presentacion di Minister Glenbert Croes na su despacho, y tambe cu presencia di Departamento di Labor, unda cu el a splica un poco mas tocante e propuesta di reformanan di e pakete di e Landspakket. E contenido di e Landspakket ta caminda cu na aña 2020, gobierno di Aruba hunto cu Hulanda, a cera un acuerdo p’asina bin cu reformanan den e aparato gubernamental. T’asina cu nan a parti nan den ocho categoria, bao diferente leter di A te cu H”, Berlis a duna di conoce.
El a agrega cu e parti di letter I ta referi y atende cu e reforma economico ta caminda cu e comision fiho di Labor ta enfoca su mes mas riba dje. “Esaki ta pasobra caminda cu nos ta bay enfoca mas riba e parti di labor, kico ta e retonan cu nos tin aworaki y kico ta e puntonan cu ta bin den Landspakket, nos lo mester bay traha na dje. T’asina aki cu den e presentacion cu nos a haya, den Parlamento di Aruba nos a ripara cu pa bin dilanti, ta hopi importante pa bin cu un regulacion di desempleo. Esaki ta importante, pasobra awendia, na e momentonan aki, personanan cu a perde nan trabao, dificilmente por yega na otro trabao y si nan no yega na esaki mester bay den e sistema di bijstand”, Berlis a splica.
El a subraya cu esaki tampoco ta facil y e ta algo temporal. Pues, na e momentonan aki, personanan cu ta cay den desempleo ta haci cu tambe e fondo di gobierno mester bay wordo amplia p’asina aki duna e personanan aki sosten pa nan por biba.
“Y nos sa cu e sumanan di bijstand no ta esun miho cu un persona por sobrebibi di dje. Ta p’esey, a base di investigacionnan cu a tuma lugar y investigacionnan cu ta andando, a bin cu un proposicion pa regula e desempleo. E regulacion di desempleo aki ta hopi importante, pasobra ta a base di esaki lo mester bin un sistema di seguridad social”, Parlamentario Berlis a subraya.
Kico e proposicion ta? Esaki ta cu ora un persona mester bay den desempleo, nan kier forma un fondo di seguridad social. “Akinan ta unda cu dunadornan di trabao y tambe Gobierno, lo pone un suma den e fondo di seguridad social aki, y ora un persona perde su trabao e lo por haci un peticion riba e fondo aki, y asina aki e persona ta bin na remarke pa e por sigui haya un ayudo financiero tanten cu e haya un otro trabao”, Parlamentario Berlis a señala. El a agrega cu di banda di e gremionan comercial y sindical, nan a bin den reunion y ta bezig poniendo un suma di 85 mil y 100 mil florin, pa pone den e fondo aki caba. Sinembargo, nan ta den combersacion kico ta e suma cu un persona lo mester ricibi na momento cu e ta bay cu su cesantia. “Pues, di banda di e Comision di Labor di Parlamento, sigur nos lo keda pendiente di e proceso y desaroyonan cu ta tumando lugar di parti di Labor, di e Landspakket”, e parlamentario a indica.
