Corda bon cu e momento aki vacuna di Influenza y Covid-19 ta unicamente pa grupo di riesgo  

ORANJESTAD (AAN): Departamento di Salud Publico a cuminsa cu su campaña anual di vacunacion contra Influenza y tambe ta ofrece apart na es cu ta desea dentro di e grupo di risico e vacuna contra Covid-19.

Esaki pa motibo cu Covid-19 igual cu Influenza, ta un virus respiratorio cu ta sigui ocaciona complicacion grave y asta morto cerca algun grupo di risico den nos comunidad.

   Ciudadnonan cu ta cay bou di grupo di risico ta worde fuertemente conseha pa tuma e vacuna di Influenza pero tambe esun di COVID-19 apart ta: (*) Adulto mayor di 60 aña of mas.  (*) Clientenan y dunadornan di cuido trahado den casnan y centronan di cuido.  (*) Ciudadano entre edad di 18 cu 59 aña cu anualmente riba conseho di dokter di cas of specialista ta busca nan vacuna di Influenza.  (*) Esaki ta inclui esnan cu obesidad (BMI ≥40).  (*) Adulto y mucha cuminsando for di 6 luna di edad cu ta mentalmente incapacita. (*) Demas dunadornan di cuido cu tin contacto cu pashent diariamente.

   E grupo di riesgo cu ta worde fuertemente conseha pa tuma unicamente e vacuna anual di Covid-19 ta: (*) Adulto y mucha cuminsando for di 6 luna te cu 59 aña cu riesgo medico halto (por ehempel es cu ta sufri di malesa cu ta debilita nan sistema inmunologico).  (*) Hende muhe na estado rond di 22 siman. Pa e miho proteccion ta conseha pa vacuna den e di 2 trimenster di embaraso. (*)  ‘Bedlegerig’ pashent (esnan na cama/inmobil) na cas, cuminsando for di 6 luna tambe ta bin na remarke pa ricibi e vacuna di Influenza y Covid-19 completamente gratis. Pero tur lokual ta nesesario ta un prueba di AZV y un cita cu mester worde traha na DVG via telefoon 522-4200.

   Riba e dianan menciona aki bou, DVG lo ta den diferente bario rond Aruba unda es cu ta cay bou di grupo di risico aki riba menciona cu exepcion di clientenan cu ta biba den cas di cuido, dunadornan di cuido y ‘bedlegerig’ pashent’ demas grupo di risico por yega mas facil cerca nos pa busca su vacunanan. Ta importante si pa tene na cuenta cu algun persona di e grupo di risico mester un recept di dokter di cas. Durante e bishitanan den bario lo tin e vacuna di Influenza y tambe esun di Covid-19 disponibel pero separa. Cada vacuna lo worde duna apart.

   Comunidad general entre edad di 6 luna cu 59 aña cu ta sano, y no ta cay bou di grupo di risico no ta bin na remarke na e momentonan aki pa ricibi e vacunanan aki.