Ministro Glenbert Croes ta satisfecho
ORANJESTAD (AAN): Dialuna ultimo, Minister di Labor Glenbert Croes, acompaña pa demas colega minister y parlamentario, tabata presente na Enseñansa pa Empleo (EPE), na unda a tuma luga e apertura oficial di e facilidadnan completamente renoba y moderno, y e develo di e branding y logo nobo.
E logo aki, ta representa un trapi di crecimento, direccion bay ariba cu ta significa progreso, pasobra EPE t’ey pa e desaroyo y progreso personal di e cursista. E colornan di e logo ta representa entre otro, positivismo, confianza, lealtad y sabiduria.
Durante e ultimo añanan, por a nota cu e interes di comunidad pa bay dilanti y crece den nan trabao ta grandi. Den 2022 un total di 620 persona a tuma curso na Enseñansa pa Empleo, cu ta ofrece un diversidad grandi den tipo di cursonan, cu ta hustamente locual e mercado laboral mester di dje. Importante pa remarca, ta e hecho cu den 2023, EPE a logra drecha e oportunidad laboral di 1630 cursista.
EPE tin un variedad di cursonan disponibel pa hendenan local, internacional y di cualkier edad. E cursonan cu EPE ta ofrece ta entre otro di idioma manera Ingles, Hulandes y Papiamento, curso di Office Skills, Customer Service, Computer pa Principiante, mercadeo, administracion manera Boekhouden diferente nivel, y mucho mas. E cursonan mas gusta, ta esunnan di Waiters, Casino Dealers y e Klein Vaarbewijs, cu desde aña pasa, tin su examen practico tambe cu mester por domina, pa por logra e licencia pa maneha un boto. Mester bisa cu resultadonan di por ehempel cursistanan pa Casino Dealer, tin practicamente trabao garantisa.
Na 2022, cursistanan tabata tin e opcion pa scohe entre 19 diferente vak, pero awor na 2023, esaki a conoce un ampliacion y a yega te na 27 diferente curso. Esaki ta e motibo tambe cu EPE mester a aumenta e klasnan pa duna les, di 31 pa 64. Awe e cursistanan por goza di localnan completamente remodela y moderno, ofreciendo nan un ambiente mas agradabel y eficiente pa por siña.
Durante e ceremonia importante aki, a logra na scucha testimonio di algun cursista, cu a relata nan experiencia na Enseñansa pa Empleo. Aki algun di nan:
(*) Annie tumando e les di waiter, a splica con bon e docencia di e curso ta enfocando riba calidad y bon servicio na nos turistanan.
(*) Ricardo a tuma ya diferente curso na EPE, pa por hisa su nivel di conocimento. E ta asina agradecido pa tur oportunidadnan cu EPE ta ofrece y na tarifa social cu plan di pago.
(*) Marlene a expresa cu pa siña nunca ta laat pasobra cu esey bo ta avansa. Tur e cursonan cu el a tuma a yud’e crece hopi den su funcion.
Manera esakinan tin hopi testimonio mas, indicando e profesionalismo di e docentenan, e flexibilidad di pago cu EPE ta ofrece, e variedad di cursonan cu tin disponibel, e orarionan flexibel y hopi otro aspectonan positivo mas.
Minister Glenbert Croes a indica di ta sumamente orguyoso di e full e team di EPE, consistiendo di solamente 10 hende, pero cu hunto ta logrando avansenan grandi pa Enseñansa pa Empleo y pa su clientenan. Pa Minister Croes, como Minister di Labor, esaki sigur ta un logro grandi, mirando cu e ta facilita e proceso, di esnan cu kier un trabao, pa drenta e mercado laboral, ampliando nan e conocemento y experiencia necesario.
