ORANJESTAD (AAN) – Den conferencia di prensa di gobierno, Diaranzon mainta, CEO di Oficina di Turismo, señora Ronella Croes tambe a hiba palabra.
Ronella Croes a reitera cu locual e aña aki, y incluso aña pasa, ATA a mira como desaroyo di turismo na final di aña pasa, sigur tabata tin su impacto riba turismo pa e luna di Januari.
El a referi na e resultado di luna di Januari cu ATA tin, aworaki, y esey ta mustra un total di 59.573 bishitante stay over, loke kier cu Aruba a perde 42% di locual tabata tin proyecta inicialmente, cu lo a ricibi na luna di Januari.
Esaki a bin pa motibonan ya menciona, incluyendo omicron y cu CDC na Merca a pone Aruba na nivel di riesgo 4, etc. Ronella Croes a señala cu ATA a cuminza aña cu mas reto, y pa bay specificamente riba e resultado di Januari, kico esaki kiermen cu Aruba a recupera 63% di locual a ricibi na Januari 2019. Pues, bayendo bek na e ultimo Januari normal. Director di ATA a subraya tres mercado cu nan ta sigui di cerca y cu a raporta tambe, separadamente, mirando cu nan ta dunando bon resultado. “Naturalmente, Merca cu pa luna di Januari, compara cu Januari 2019, a recupera cu 70%. Si nos tira un bista riba e mercado Hulandes, Hulanda a recupera cu un total di 98% na luna di Januari; y pa ultimo, Colombia cu a recupera cu un total di 65%”, Croes a splica.
Director di ATA a sigui bisa cu e impacto di omicron y e caida cu a mira na Januari, a haci cu ATA a keda ahusta su proyeccionnan tambe pa e prome cuartal di e aña aki. “Esaki por mira ilustra den escenarionan conservativo, cu nos a aplica. Pues cosnan cu ATA tin caba basicamente formula, internamente. Pero nos a dicidi di aplica e escenario conservativo pa e lunanan di Februari y Maart”, Ronella Croes a splica.
Esaki kiermen pa e luna di Februari cu ATA tabata tin inicialmente den su proyeccion, un total di cerca di 89 mil bishitante; aworaki, nan tine na 62 mil bishitante, mas of menos, proyecta pa Februari.
“Mi por bisa si, cu a base di e cambionan cu nos mes ta haci como Aruba, pues pensa aki riba e diferente cambionan na maneho di entrada. Nos ta mirando impacto positivo di e flexibilizacionnan aki”, CEO di ATA a comenta.
El a agrega cu a base di nan analisis, nan ta kere cu por surpasa e cantidad di 62 mil bishitante, na luna di Februari. “Esey ta netamente, locual nos ta pushando pe, te den grado cu por, pasobra naturalmente, e cambionan ta hopi reciente. E impacto kizas, di algun siman, bo no ta bay mire di e manera cu nos ta desea di mire”, Croes a agrega.
El a reitera cu e ta spera mas di 62 mil bishitante, pero loke si no ta kere ta logra e proyeccion inicial di casi 89 mil turista pa Februari, pero e lo ta mas cu e luna di Januari, y e tendencia ey tambe lo continua pa Maart.
