Sigur den un situacion di confrontacion directo entre gerentenan y Gobierno - Informacion DIARIO riba dianan di vacacion extra ta haya mas base - Menasa cu Gerencia mester paga 2.5 Miyon cu ta contra Acuerdo cu Hulanda
ORANJESTAD(AAN)- Durante fin di siman DIARIO a keda ocupa cu informacionnan cu tabata sigui drenta a base di e desaroyonan na WEB, caminda dia 3 di auguistus dos miembro di Gerencia mester a sinta na mesa cu Utilities Aruba NV pa defende e forma cu nan a atende cu nan contracto di trabou como gerente.
Como e matutino di Pueblo, DIARIO a sigui informa su mes riba desaroyonan na WEB Aruba NV, e compania di awa y coriente cu manera DIARIO a splica den tempo di guera of peliger nacional manera calamidad, mester ricibi proteccion special pa sigura cu e ta keda operativo pa Pueblo.
Un punto cu a hala tur atencion tabata e informacion cu DIARIO a ricibi na fin di siman pasa, cu den e situacion sumamente dificil cu a surgi entre Utilities, cu ta representa Aruba y asina tambe Gobierno, gerencia di WEB Aruba NV a dicidi cu e ta yega na un areglo cu e trahadonan cu durante e periodo di Prome di Juni pa 31 di December 2021, nan ta ricibi dos dia extra di vacacion pa luna, loke ta nifica cu pa 2021 nan ta ricibi 14 dia extra di vacacion, loke tin resultado financiero serio pa Aruba.
DIARIO basta tempo pasa a entrega Aruba e cifranan relaciona cu gastonan di personal di WEB cu ta pasa 60 Miyon annual. Cu e acuerdo cu awor Gerencia a cera cu personal di WEB, e compania no ta baha su gastanan di personal pero lo ta compensa e trahadonan cu un suma cu segun informacionnan lo ta mas cu 2.5 Miyon extra.
Informantenan clave a mustra DIARIO cu e accion di gerencia di WEB Aruba NV ta contra e contenido di e Acuerdo cu a wordo firma entre Aruba y Hulanda pa Aruba a haya sosten financiero di Hulanda na 2020.
A wordo palabra cu gerencia di WEB por a dicidi con e kier reduci e gastonan na e compania y si e kier haci esaki riba entre otro e gastonan na vacacion por ehempel.
E hecho cu awor gastonan ta subi 2.5 Miyon aparentemente ta haci e problemanan entre gerencia di WEB Aruba NV y Utilities Aruba NV mucho mas grandi.
DIARIO hasta a wordo informa cu Utilies lo kier tene e gerentenan di WEB personalmente responsabel pa pago di e suma aki.
Segun informantenan e hecho cu den un tempo asina dificil, “explosivo” pa e tension cu ta reina, gerencia di WEB sin consuilta ni Gobierno ni Utilities ta dicidi pa e areglo cu resultado financiero pa WEB, ta crea mas problema.
Informantenan a indica cu ora tin un situacion tenso entre gerencia di un compania y propietarionan, no ta normal cu ta yega na un areglo den cual e trahador ta haya un inclinacion na fabor di gerencia si e ta duna algo cu no ta na interes di e compania.
Mientrastanto siman nobo mester trece basta informacion pa Pueblo. Aparentemente Luis Oduber lo a yega na un acuerdo cu Utilities pa e bay cas y for di Diasabra lo no ta den empleo di WEB mas.
Informantenan ta indica cu Randolph Ruiz no a yega na un acuerdo cu Utilities pa e bay cas pero kier un mihor oferta.
Dia 3 di Augustus mester tabata e dia cu e dos gerentenan mester a sinta na mesa cu Utilities cu lo a confronta nan cu un lista largo di punto.
DIARIO ta sigui pendiente di tur desaroyo pa informa su lectornan di e situacion.
