Aruba BootCamp a demostra cu Aruba mester atende ley pa proteha hobennan - Mundialmente hopi atencion pa muchanan cu ta cay den man robez y peligroso - Muchanan di grupo minoritario tin mas chens di bira victima di peligernan scondi
ORANJESTAD(AAN)- Na momento cu Gilbert Webb a presenta su mes como politico y hoben cu ta trece cambio, su aspiracion politico a gana di su actividadnan como Comandante di Aruba Boot Camp, cu ta atende cu muchanan di Aruba cu segun nan ambiente, no ta comporta nan mes.
Mucha dificil por yama pues e grupo riba cual Aruba Boot Camp tabata dirigi su mes. E grupo di mucha dificil ta e grupo di mucha cu hunto cu grupo di muchanan di gruponan minoritario ta haya hopi atencion mundialmente.
Durante ultimo simannan na Aruba e tema di abuso sexual di mucha a keda atende atrobe den un caso cu a presenta y den cual DIARIO a pidi pa atende cu tur loke ta pone mucha bira obheto di loke no ta aceptabel.
DIARIO kier tene su mes na e palabra “descubri” ora ta atende cu abuso sexual di mucha, pasobra hopi bez abuso ta keda scondi te na momento cu e wordo descubri.
Cu tin hopi mucha den problema na mundo actualmente, ta un hecho. Pero informacionnan cu ta ta haya hopi atencion mundialmente ta mustra con muchanan cu ta pertenece na gruponan minoritario, muchanan cu no ta di famianan conoci den e comunidad cu nan ta biba, mescos cu muchanan cu ta haya e nomber cu nan no ta comporta, ta muchanan cu mas por ta victima di abuso na mundo.
For di momento cu Gilbert Webb a dicidi cu e kier bira Miembro di Parlamento, e topico pa motibo di cual e tin basta tempo den noticia, a perde for di atencion.
Awor cu ta wordo papia di abuso di mucha, DIARIO si ta sigui pidi atencion pa muchanan cu mayornan of otro personanan cu ta carga responsabilidad, ta marca como mucha dificial y pa cual ta busca solucion cu por resulta den horor pa e mucha.
Huez a duna instancianan oficial na Aruba razon cu nan a bay den publicidad cu loke tabata pasa cu Aruba Boot Camp. Loke ta pasa awe, ni sikiera ta haya atencion.
Cu na Aruba e condicion di bida na un isla ta preveni situacionnan extremo cu ta wordo registra den exterior, no mester kita for di e hecho cu mester skirbi leynan cu ta dicidi na kende por entrega mucha. Mester skirbi leynan mas exacto cu ta dicidi, kende ta haya permiso pa atende cu mucha for di nan transportacion te na momento cu nan ta wordo cuida despues di school.
Prome cu eleccion DIARIO a pidi atencion pa muchanan di Aruba cu ta wordo entrega na nan mayor na cuido di otro hende. Awe tin mas cu suficiente motibo pa pidi pa leynan wordo introduci cu ta evita cu muchanan no ta wordo trata manera hende mester wordo trata, no ta wordo proteha manera peligernan mundial ta exigi na e momentonan aki.
DIARIO lo sigui traha riba e topico aki aunke Aruba Boot Camp a perde atencion na momento cu HTC a habri luga pa su dirigente presenta su mes como politico.
Pa nos Aruba Boot Camp y loke a wordo registra na e sitio a duna prueba di trato cu un mucha por ricibi y na e forma cu hende ta entrega mucha “cu no ta comporta” y asina ta bira un minoria riba nan mes, na hende cu den casonan mundial ta haci pio cu loke a pone Aruba lanta para den caso di Aruba Boot Camp!
