Director di Matchis:
ORANJESTAD (AAN): Despues cu Diahuebs e compania Hulandes Matchis a firma un MoU (Memorandum of Understanding) cu Horacio Oduber Hospital riba donacion di stem cells pa yuda contra cancer di sanger (leukemia) y pa registra donantenan, director di e compania Jaap Dijkman a hiba palabra.
El a splica cu e meta y mision di Stichting Matchis ta pa por yuda tur hende cu tin mester di stem cells, haya esaki na un prijs pagable y for di un donante adecua.
“E problema ta cu ta hopi dificil pa haya un bon ‘match’ entre un pashent y un donante”.
E chens pa un persona haya un match adecua, ta alrededor di 1 den 50.000 y pesey ta hopi importante pa tin masha hopi donante mes den un database, pa asina e chens por bira mas grandi pa yuda un pashent, segun Dijkman.
El a sigui bisa cu den e ultimo 10 añanan Matchis a inverti masha hopi mes, pa aumenta e cantidad di donante na Hulanda fuertemente.
Na dado momento nos a logra registra 50 mil donante di stem cell y mientrastanto esaki a bira mas cu 400.000.
“Tur esakinan ta personanan cu ta dispuesto pa purba yuda otronan recupera di e enfermedad serio”, segun e director di Matchis.
El a splica cu un di e problemanan pa personanan den nos region ta cu apesar di e hecho cu mundialmente tin mas cu 40 miyon donante cu a wordo haya cu por haci un donacion di stem cells, pero mayoria di e donantenan aki ta di Noord-West Europa.
El a splica cu gobierno Hulandes ta haya hopi importante pa tur hende na Hulanda y den Reino Hulandes, haya e mesun oportunidad pa wordo yuda.
Pesey ta importante pa na Aruba y e otro islanan den Caribe, mas donante posibel wordo haya.
“Mi ta kere cu via un bon cooperacion cu hospital nos ta bay logra nos meta”, segun Dijkman.
