Mente ta un Hardin: Cuid’e cu Amor
Den e drukte di bida moderno, hopi biaha nos mente ta yena di mas cu preocupacion, desordo, y pensamentonan laga na mita. Pero manera den cualkier hardin, den nos mente ta crece loke nos ta planta. Si nos ta planta miedo y rabia, yerba malo ta invadi e luga. Pero si nos ta planta paz, gratitud y berdad, nos paisahe interior ta cuminsa florece.
Riba un isla chikito manera Aruba, caminda solo ta briya pero presion di bida diario ta profundo, hopi di nos a siña pa hari mientras nos ta sinti dolornan den nos ser. Nos ta sigui dilanti hasta ora e peso di silencio ta sinti demasiado pisa. Pero cuida bo salud mental no ta un debilidad. E ta sabiduria. Mescos cu nos ta duna awa na mata y kita e sushi riba e blachinan, nos mester cuida tambe e tera di nos mente.
Esaki ta nifica pa tuma un rato pa sosega, refleha, y laga los loke no ta sirbi mas. E kiermen pa papia cu bo mes cu bondad y amor, pidi yudansa ora bo mester, y comprende cu curacion no ta un liña recht, e ta un ritmo, mescos cu lama cu ta forma nos costanan.
Un mente sano ta rekeri tempo y cuido. Un acto consciente di cultivacion. Un obra di amor. E no ta un tarea di un dia. Pa tene bo mente den balansa, bo mester ta consciente di kico bo ta planta aden. Tur mainta ora bo lanta, Dios ta duna bo tera fresco pa planta. Pero ta bo mes mester scoge: bo lo planta paz of panico? Fe of miedo? Speransa of desanimo? E simianan cu bo ta planta awe, lo crece mañan. Y asina, paso pa paso, bo ta crea un mundo interior cu ta refleha paz, claridad y gratitud.
Reflexion:
Tuma cinco minuut awe pa mira den bo mente. Kico ta crece eyden? Si bo mira yerba malo, pensamentonan di miedo y duda, kita nan cu pasenshi. Planta den nan luga, palabranan di gratitud, speransa, y amor. Corda semper: manera un hardin, bo mente ta refleha e cuido cu bo ta dun’e. Duna awa na bo paz, cuida bo alegria, y laga bo pensamentonan sano florece den luz di bo consenshi.
