Ministro Geoffrey Wever den Gobierno nobo:
ORANJESTAD (AAN): Diabierna siman pasa durante tratamento di e Presupuesto 2025 den Parlamento di Aruba, tabata Parlamentario Dangui Oduber kende a puntra con ta posibel cu Ministro di Partido Futuro kier reduci peso financiero riba cartera di pueblo, pero na mesun momento recien a tuma decision pa hisa prijs di gas pa comunidad te na 80 Florin pa boter.
Esaki ta un decision cu el a haya ta incomprendibel, pasobra e actual doño nobo di e compania di gas a blof cu nan a haci ganashi miyonario recien. Pues e ta haya cu e aumento di boter di gas subsidia ta un wanta den cara di comunidad, pero ta un victoria pa e doño nobo cu su miyonario ganashi.
Riba esaki, Ministro nobo di Asuntonan Economico y Finanzas, esta Geoffrey Wever a contesta riba loke nan ta haciendo pa mitiga mas aumento. El a splica cu nan a pidi consehonan, y a ricibi esey. Pero ta rekeri un ‘uitwerking’ mas amplio, pues no ta djis hisa benta. El a splica cu e uitwerking ta den preparacion.
Mester corda cu entrante 1 di Mei 2025 nan lo percura pa un reduccion di accijns di 10 cen, cu ta un impacto inflatorio positivo mas grandi pa e consumidor, compara cu loke ta e aumento di prijs di gas.
A haci pregunta na Ministro Wever tambe, kico ta e motibo pa no duna reparatietoeslag di 700 Florin. El a bisa cu ta bunita gesto di Gobierno pa aumenta reparatietoeslag cu 250 Florin pa pensionadonan, pa asina introduci esaki entrante 1 di Mei 2025.
Ta bay tuma awor e tempo, pa check tur conseho y papia riba un ‘inkomen-toets’ pa asina por crea mas espacio pa duna na esnan cu realmente tin mester di dje. Haciendo uso di ‘inkomen-toets’, e ta sali menos costoso. Tur esey ta trabaonan cu ta bay wordo haci den periodo nos dilanti.
Pero e meta ta poni den e Plan di Gobernacion nobo, esta e plan pa mehoramento di poder di compra, y e plan pa reduccion di costo di bida, pasobra esey ta e meta principal di Gobierno AVP-Futuro.
“Duna bek y pa e motibo ey ta bin cu un plan mas holistico, y esaki simplemente ta e prome salida,” Ministro Wever a finaliza bisando.
